ИСТАНБУЛ (АА) - ЃОКХАН КАВАК / ТУФАН АКТАШ -
Експертите сметаат дека благодарение на политиката на Турција и нејзините блиски односи со африканските земји, таа е новиот балансирачки фактор за земјите од африканскиот континент, кои остануваат заглавени во конкурентноста меѓу големите економски сили.
Пред Третиот самит за партнерство Турција - Африка, кој се одржува во Истанбул од 16 до 18 декември со учество на шефови на држави, министри и претставници од меѓународни институции, експерти во разговор со Агенција Анадолија (АА) дадоа оценка за Самитот, истакнувајќи дека економското присуство на Турција на африканскиот континент ќе се зајакне во наредните години.
Наведувајќи дека Турција со својот повеќестран пристап стана стратешки партнер во некои земји, експертите истакнуваат дека Самитот е важна можност за придвижување на односите кон повисоко ниво.
- Пристапот на Турција кон Африка е „повеќенасочен“ и „повеќенаменски“ -
Проф. д-р Алекси Илонен, вонреден професор на Меѓународниот универзитет во Кенија, изјави дека по 2000 година, Турција, зајакнувајќи го своето економско присуство во Африка, даде значителен придонес во својата индустрија.
Илонен, експерт за Рогот на Африка, рече дека инвестицијата направена во Сомалија во периодот од 2011 година досега доведе до придобивки во економска и политичка смисла, додавајќи дека во следните години преминала во други земји како што се Етиопија и Кенија.
Истакнувајќи дека економските иницијативи обезбедиле придобивка во областа на одбранбената индустрија, Илонен продолжи со зборовите: „Турција во моментов е важен странски партнер на лидерите од голем број африкански земји, особено на етиопскиот премиер Абиј Ахмед и сомалискиот претседател Мохамед Абдула Фермаку.“
Илонен рече дека пристапот на Турција кон Африка е „повеќедимензионален“ и „повеќенаменски“, истакнувајќи дека е многу вредна и улогата на невладините организации.
„Пристапот на Турција изгледа попрагматичен и фокусиран е на економските интереси“, рече Илонен, додавајќи дека економската експанзија ќе продолжи, имајќи ги предвид растечкиот пазар и големината на развојните потези во Африка.
- „Турција станува фактор на рамнотежа“ -
Д-р Шуаибу Шеху Алију, професор на Универзитетот „Ахмаду Бело“ во Нигерија, истакнувајќи дека блиските односи на Турција со африканските земји се зголемени од 1998 година, рече: „Би сакал да ѝ честитам на Турција за двата самити одржани досега. Нема сомнеж дека Турција на меѓународната сцена е рамнотежа против заканите и конкурентноста на големите економски сили од Западот.“
Зборувајќи дека Турција, благодарение на тоа што е исламска земја и има историско наследство како Османлиската држава од минатото, д-р Алију истакна дека станува збор за земја која претставува важен пример за земјите со блескави економии и воена моќ надвор од Европа.
Наведувајќи дека Турција стана моќен блок не само на Блискиот Исток, туку и во Африка, д-р Алију истакна: „Турција претставува алтернативна парадигма за развојот и растот на Африка. Поради таа причина, Турција и африканските земји треба да ги развиваат односите, особено на економско и воено поле.“
Нигерискиот академик Алију рече дека Турција треба да продолжи да ги развива своите односи на културен план поради нејзиното османлиско историско минато, кое во минатото имало контакт со голем број делови од Африка.
- „Треба да се извлечат поуки од политиката на Кина“ -
Истакнувајќи дека Турција за својата политика кон Африка треба да учи од политиките што ги води Кина, д-р Алију рече: „Кина дејствува како алтернативна порта за Африка и го руши монополот на високо експлоататорскиот Запад.“
Во однос на Самитот, д-р Алију порача дека Турција треба да понуди можности за африканските земји и со тоа да ја зајакне соработката и односите во областа на борбата против тероризмот, образованието, науката и технологијата, земјоделството, инфраструктурата и градежништвото.
„Самитот Турција - Африка, за разлика од западните земји, е важен чекор во воспоставувањето односи во рамките на хуманоста, братството и меѓусебното почитување. Затоа, Самитот е највисоката платформа во воспоставувањето на односите меѓу Турција и африканските земји. Од друга страна, Самитот е важен и за зголемување и зајакнување на меѓусебните договори и инвестиции“, рече д-р Алију.
- „Турција презеде важна улога, особено на полето на хуманитарната помош“ -
Кенискиот научник и проповедник Шејк Јакуп Фарах Хасан рече дека односите на Турција со африканските земји се силни и истакна дека овие односи, особено од 2008 година досега, се зголемени во подрачјата како што се образованието, трговијата, здравството и хуманитарната помош.
„Суши ги зафатија Сомалија, Етиопија и Кенија во 2011 и 2012 година. Во тој период Турција презеде важна улога, особено на полето на хуманитарната помош“, посочи Хасан.
