Со бојкот на опозицијата во Египет започнаа претседателските избори

КАИРО (АА) - Во Египет утрово започнаа тридневните претседателски избори кои во голема мера ги бојкотира опозицијата, јавува Anadolu Agency (AA).

Избирачките места во сите египетски покраини утрово беа отворени во девет часот по локално време, а гласачите ќе можат да гласаат во следните три дена.

Во изборната трка за претседател на Египет учествуваат само двајца кандидати, актуелниот претседател Абдел Фатах ал Сиси и претседателот на партијата Утре, Муса Мустафа Муса.

Право на глас имаат речиси 60 милиони гласачи во Египет и во дијаспората, а утрово низ Египет се отворени вкупно 13.687 избирачки места.

Во изборниот процес ангажирани се 103.000 службеници, а процесот е надгледуван од 18.678 службеници од правосудството.

Изборите во Египет ги следат и девет странски организации и 680 акредитирани странски новинари.

Опозициските партии и групи, вклучувајќи го и Муслиманското братство (Ихван), речиси во целост ги бојкотираат изборите.

Претседателскиот кандидат Муса, единствениот противкандидат на сегашниот претседател Ал Сиси, во опозициските кругови важи за ирелевантен политичар инсталиран од владеачката египетска структура со цел да се создаде впечаток за конкуренција во изборниот процес.

Аналитичарите предвидуваат дека Ал Сиси веќе во првиот круг ќе ја слави победата со големо мнозинство гласови.

Египетската дијаспора гласаше минатата недела, а излезноста беше под очекуваното. Резултатите од изборите ќе бидат познати на 2 април.