Словенечката Комисија за спречување на корупцијата го испрашува премиерот Голоб поради наводи за притисок врз полицијата

ЉУБЉАНА (АА) - Членовите на Комисијата за спречување на корупцијата (КСК) разговараат со словенечкиот премиер Роберт Голоб во врска со наводниот притисок врз полицијата, известува Анадолу.

Се очекува разговор и со поранешната министерка за внатрешни работи Татјана Бобнар и поранешниот директор на полицијата Боштјан Линдав.

Покрај премиерот Роберт Голоб, Комисијата за спречување на корупцијата ќе сослуша и неколку сведоци како дел од истрагата за наводни политички притисоци врз работата на полицијата. Извештајот против премиерот до КСК и до Обвинителството во ноември минатата година го достави поранешната министерка за внатрешни работи Татјана Бобнар, која пред две години поднесе оставка од таа функција по кавгата со Голоб.

Бобнар го обвинува Голоб за мешање во работата на полицијата и другите надлежни државни органи.

КСК започна истрага против премиерот во ноември минатата година поради сомневање за повреда на интегритетот, но истрагата потоа беше прекината неколку пати. Претседателот на КСК, Роберт Шуми, се иззел од постапката поради неговото познавање со Татјана Бобнар.

Стојан Здолшек, адвокатот на Голоб, побара изземање на поранешниот заменик-претседател на КСК, Симон Савски, а пред суд го оспори отфрлањето на барањето за изземање. Со почетокот на мандатот на Тина Дивјак, новата заменик-претседателка на КСК, стана ирелевантна причината поради која Комисијата не можеше да ја продолжи истражната постапка.

КСК дури во текот на летото донесе одлука истрагата да продолжи, а кон крајот на август донесена е одлука да му се овозможи на Голоб да го види досието, односно документацијата што КСК ја води за овој случај. КСК потоа во октомври сакаше да го сослуша Голоб, но неколку сведоци побараа продолжување, а неговиот адвокат Здолшек достави нови докази до Комисијата, кои КСК мораше да ги испита.

Поради наводните притисоци, полицијата во октомври годинава поднесе пријава против Голоб и тоа за кривично дело давање подарок за незаконско посредување. Предметот го води Специјализираното државно правобранителство.

Сепак, премиерот неколку пати јавно ги отфрли овие обвинувања и ги сметаше за политичка пресметка од страна на поранешната министерка Бобнар.

КСК планира да одржи неколку интервјуа, меѓу кои и со поранешната министерка Бобнар и поранешниот в. д. главен директор на полицијата Боштјан Линдав. Нивните адвокати потврдија дека и двајцата ќе дојдат на разговор.

Од КСК појаснија дека прво ќе биде сослушан премиерот, а потоа сведоците, а на разговорите може да присуствува премиерот или негов полномошник.

Очекувано, говорот на премиерот во КСК има одек и на политичката сцена, а критичарите се главно од опозициските Словенечка демократска партија (СДП) и партијата Нова Словенија - Демохристијани (НСи).

Претставникот на СДП, Андреј Хојвик, изјави дека очекуваат Комисијата јавно да соопшти за што ќе разговараат и што ќе каже премиерот „на ова рочиште, а не на разговорот“.

Во НСи, пак, разговорот го гледаат како фарса, бидејќи премиерот долго време се криел.

„Тој ги искористи сите сили на демократските институции за да ги одложи сослушувањата и разговорите пред КСК. Ние навистина не очекуваме ништо од тој разговор“, рече шефот на пратениците на НСи, Јанез Циглер Краљ.