Славење низ САД: Поранешниот полицаец прогласен за виновен за убиство на Џорџ Флојд

МИНЕПОЛИС (АА) - Поранешниот полицаец од Минеаполис, Дерек Шоувен, е прогласен за виновен за сите три точки од обвинението за убиството на Афроамериканецот Џорџ Флојд во 2020 година, а чија смрт предизвика протести низ Соединетите Американски Држави (САД), јавува Агенција Анадолија (АА).

На поротата ѝ беа потребни околу 10 часа да донесе пресуда, а одлуката ја поздравија илјадници луѓе собрани пред зградата на судот.

Шоувен е прогласен за виновен по обвиненијата за убиство од втор степен, убиство од трет степен и убиство од небрежност.

Веста за пресудата е прославена на улиците низ САД. Американскиот претседател Џо Бајден изјави дека пресудата против поранешниот полицаец е огромен чекор напред во борбата на САД против системскиот расизам.

Афроамериканецот Џорџ Флојд беше уапсен во мај 2020 година за наводен обид за користење на фалсификувана банкнота од 20 долари. Полицајците со колено му го притискаа вратот додека тој девет минути ги молеше да му дозволат да дише.

Флојд почина како резултат на тој брутален обид за апсење, а тој инцидент предизвика бран антирасистички протести низ САД и светот.