Сирија: Терористите на ЈПГ/ПКК за еден месец насилно регрутираа 2.700 млади лица од Хасека

ХАСЕКА (АА) - МОХАМАД МИСТО -

Терористичката организација ЈПГ/ПКК минатиот месец регрутира најмалку 2.700 млади луѓе, од кои повеќето Арапи, во североисточната сириска покраина Хасека, јавува Агенција Анадолија (АА).

Според информациите на АА од локални извори, терористичката организација ЈПГ/ПКК насилно продолжува да регрутира млади луѓе во Хасека.

Терористите на ЈПГ/ПКК, при рациите на контролните пунктови и домовите низ покраината во март, под закана со оружје регрутираа најмалку 2.700 лица на возраст меѓу 21 и 34 години.

Младите, претежно Арапи, привремено една недела се задржани во таканаречениот центар за упатување на ЈПГ/ПКК во областа Панорама во центарот на градот Хасека.

Потоа терористите ги пренесуваат регрутираните млади во таканаречените кампови за обука во Хасека.

ЈПГ/ПКК им се заканува на младите лица кои ги киднапира во Сирија за да не бегаат од камповите, каде што се обучуваат да користат оружје.

Најмалку еден млад човек беше повреден во јануари кога терористите отворија оган врз група млади луѓе кои избегаа од присилното регрутирање во Хасека на североистокот на земјата.

Организацијата применува слични практики во покраините Рака и Деир ез-Зор што ги окупира.

Во јануари терористичката организација насилно регрутира повеќе од 150 млади луѓе од Деир ез-Зор.

- Организацијата сака да ги регрутира и наставниците -

Сириската мрежа за човекови права, во својот извештај споделен со дописникот на АА на 18 февруари, соопшти дека терористичката организација привела најмалку 61 наставник во јануари и февруари.

Во извештајот на мрежата беше наведено дека терористичката организација следела приближно 550 наставници кои не сакале да се приклучат во нејзините редови во регионите што ги окупира.