СЗО: 160 милиони луѓе во Нигерија се изложени на ризик од жолта треска

АБУЏА (АА) - Светската здравствена организација (СЗО) информира дека 160 милиони луѓе во Нигерија се изложени на ризик од епидемија на жолта треска, пренесува Агенција Анадолија (АА).

Ен Едес Жан Батист, службеничка на СЗО во Нигерија, истакна дека 160 милиони луѓе во земјата која има вкупно население од 206 милиони, се изложени на ризик од епидемија на жолта треска.

Батист рече дека оваа бројка сочинува околу 25 отсто од сите луѓе изложени на ризик од жолта треска во Африка.

Наведувајќи дека жолтата треска е опасна, Батист рече: „Мал процент од пациентите може да ја преживеат токсичната фаза на болеста. Може да има крварење од устата, носот и очите, а половина од нив умираат за 7 до 10 дена.“

Над 130 луѓе починаа во Нигерија поради епидемијата на жолта треска во 2020 година.

- Владата се бори со епидемијата од 2017 година -

Вирусот кој предизвикува жолта треска обично кај луѓето се пренесува преку комарци.

Болеста започнува со болка, гадење и повраќање, а потоа напредува со крварење.

Владата се бори со епидемијата која започна на 12 септември 2017 година.

Со кампањата за вакцинација иницирана од Нигерискиот центар за контрола на болести (NCDC) и Нигериската национална агенција за развој на прва помош (NPHCDA), во последните две години 45 милиони луѓе се вакцинирани против жолтата треска.