Северна Кореја соопшти дека тестирала систем на повеќецевен ракетен лансер со голем калибар

ИСТАНБУЛ (АА) – Северна Кореја денес потврди дека извршила тестирање на систем на повеќецевен ракетен лансер со голем калибар, при што лидерот Ким Џонг Ун најави дека претстојниот конгрес на владејачката партија ќе ги утврди следните чекори за дополнително зајакнување на нуклеарниот одбранбен капацитет на земјата, објави државната агенција КЦНА, пренесува Анадолу.

Управата за ракети на Демократска Народна Република Кореја (ДНРК) вчера го спровела тестирањето, со цел да ја провери ефикасноста на системот за ракетен лансер, унапреден со нова технологија.

Лансирањето било лично надгледувано од Ким, во придружба на високи државни и партиски функционери.

При тестирањето биле истрелани четири ракети, кои погодиле цел во водите на оддалеченост од 358,5 километри од местото на лансирање.

Ким изјави дека тестирањето има „големо значење за подобрувањето на ефикасноста на нашиот стратегиски капацитет на одвраќање“, тврдејќи дека технолошките унапредувања максимално ја зголемиле моќта на системот.

„Сигурен сум дека ниедна друга земја нема да ја стекне оваа технологија или да поседува ваква способност барем следните неколку години“, рече Ким, предупредувајќи дека резултатите од тестирањето претставуваат сериозна закана за силите што бараат воена конфронтација со Пјонгјанг.

Тој, исто така, најави дека следниот конгрес на Работничката партија на Кореја ќе ги разјасни идните планови за натамошно зајакнување на нуклеарниот одбранбен капацитет, нагласувајќи дека градењето на добри офанзивни капацитети останува клучна точка на националната одбранбена политика.

Вчера, владите на Јапонија и Јужна Кореја соопштија дека Северна Кореја истрелала две балистички ракети кон Источното Море.

Овие лансирања се втори овој месец, по оние на 4 јануари, кога јужнокорејскиот претседател Ли Џе Мјунг ја започна државната посета на Кина.