Beyza Binnur Dönmez
29 Јули 2025•Ажурирај: 31 Јули 2025
ЖЕНЕВА (АА) – Светската програма за храна (WFP) на ОН денес соопшти дека најновиот извештај на Интегрираната класификација на фазите за безбедност на храната (ИПЦ) за Газа не треба да се сфати само како предупредување, туку како итен повик за акција, нагласувајќи дека мора да се преземат сите можни мерки пред да дојде до „хипотетичка декларација за глад“, јавува Анадолу.
„Ова не е предупредување. Ова е повик за акција. Ова е нешто што не сме го виделе во овој век“, изјави директорот за вонредни состојби на Светската програма за храна, Рос Смит, на прес-конференција во Женева.
„Јасно е дека ни треба итна акција – сега“, додаде тој.
Претходно, ИПЦ – глобалниот систем за следење на гладот – соопшти дека во Газа се одвива „најлошото сценарио на глад“, во услови на засилен конфликт, масовно раселување и драматично намален пристап до храна.
„Постојат сè повеќе докази дека широко распространетото изгладнување, неисхранетоста и болестите доведуваат до пораст на смртните случаи поврзани со глад“, стои во најновиот извештај на ИПЦ.
Уште еден официјален претставник од Светската програма за храна, Жан-Мартин Бауер, појасни дека овој извештај „официјално не прогласува глад“, но „она што ви го кажуваме сега е дека индикаторите што ги гледаме во Газа го надминаа прагот на глад за потрошувачката на храна и за неисхранетост, и она што ви го кажуваме, уште еднаш, е дека акцијата треба да се преземе веднаш“.
„Не треба да чекаме хипотетичка декларација за глад за да направиме сè што можеме за да го спречиме страдањето“, додаде тој.
Според ИПЦ, пристапот на луѓето до храна низ Газа е „сега алармантно нестабилен и исклучително опасен“, бидејќи од 27 мај над 1.000 луѓе се убиени додека се обидувале да дојдат до храна.
Израел применува блокада на Газа веќе 18 години, а од 2 март ги затвори сите премини, со што се влошија хуманитарните услови во енклавата.
Според Министерството за здравство на Газа, најмалку 147 лица починале од глад од октомври 2023 година, меѓу кои 88 деца.
И покрај меѓународните повици за прекин на огнот, израелската Армија води интензивна офанзива во Газа од 7 октомври 2023 година, при што се убиени над 60.000 Палестинци, најголем дел од нив жени и деца.
