ВАШИНГТОН (АА) - Соединетите Американски Држави (САД) денес ја одбележуваат 22-годишнината од терористичките напади што се случија на 11 септември 2001 година, во кои загинаа околу 3.000 луѓе кога терористите на Ал Каеда нападнаа финансиски и политички центри, јавува Анадолу.
Тоа беше ден кој го промени светот во секоја смисла на зборот.
За муслиманите, кои и самите беа меѓу жртвите на нападот, тоа беше почеток на мрачна ера во која се демонизирани поради својата вера и идентитет.
По 11 септември, милиони муслимани кои живеат во САД сè повеќе стануваат цел на исламофобични напади, а тие предрасуди се „сè уште живи“ 22 години подоцна, сметаат експертите.
„Исламофобијата ќе остане средиштен дел во американската политика во догледна иднина бидејќи муслиманите се жртвено јагне во американската имагинација, дури и денес“, рече Халид Али Бејдун, професор по право на државниот факултет во Вејн, во сојузната американска држава Мичиген.
Според него, кога размислуваат за тероризам, првото нешто на што помислуваат се муслиманите.
Тој рече дека е „навистина важно“ да се размислува за исламофобијата „надвор од американските граници“.
„САД 'во глобала ја извезоа исламофобијата', давајќи им простор на другите влади како Кина, Мјанмар и Индија да се пресметаат со муслиманите“, наведе Бејдун.
Како што истакна, „гледаме дека американското наследство на исламофобијата веднаш по терористичките напади на 11 септември се глобализира и се извезува во земјите, блиски и далечни“.
Но, Бејдун нагласи дека исламофобијата во САД „не е толку интензивна како претходните години“, велејќи дека тоа е „во голема мера затоа што поранешниот американски претседател Доналд Трамп не е на власт“.
Нихад Авад, извршен директор и коосновач на Советот за американско-исламски односи (CAIR), најголемата американско-муслиманска група за човекови права, рече дека исламофобијата се манифестирала на „грд и насилен начин“ веднаш по терористичките напади.
„Нападите на 11 септември беа против сите Американци, вклучително и муслиманите, но реакцијата кон американските муслимани беше болна за муслиманите, кои беа обвинети за нападите и беа поврзани со терористите кои ги извршија злосторствата“, рече Авад.
Многу муслимани се соочија со смртни закани, физички напади и вознемирувања по 11 септември, додека неколку џамии беа вандализирани, според сведочењето во Конгресот од 2011 година од страна на правната застапничка група „Southern Poverty Law Center“.
Злосторствата од омраза против муслиманите драстично се зголемија непосредно потоа, скокнувајќи за 1.617 отсто од 2000 до 2001 година, според ФБИ, означувајќи една од најголемите бројки на исламофобични дела од омраза што некогаш биле забележани во Америка.
Авад рече дека Советот за американско-исламски односи (CAIR) и други муслимански организации исто така биле цел, додека тој, меѓу останатите, бил ставен на „листата за надзор“.
„Ми вршеа распит на аеродромите кога се враќав од прекуокеанските патувања. Требаше многу време за навистина да ме тргнат од листата“, рече Авад.
Според неговите зборови, тој и уште неколку истакнати членови на муслиманската заедница биле под надзор на американската Влада.
Авад рече дека американската муслиманска заедница денес е „многу поголема“, со тоа што Советот за американско-исламски односи (CAIR) има повеќе од 60 адвокати со полно работно време за подигнување правни постапки за извршени неправди против муслиманите.
„Но, тоа не значи дека исламофобијата исчезна затоа што сме посилни“, нагласи Авад.
Кога се случија терористичките напади на 11 септември, Бејдун бил студент кој живеел во Калифорнија.
„Се сеќавам на нападот врз мајка ми затоа што носи хиџаб. Сестра ми се соочуваше со дискриминација затоа што носеше хиџаб“, раскажа Бејдун.
Американските муслимани свртуваат внимание и на значајна промена кон муслиманите во администрациите на Трамп и Џо Бајден.
Претседателот Џо Бајден ја продолжи долгогодишната традиција во мај со организација на прославата на Бајрам во Белата куќа, традиција што беше прекината од Трамп.
Набргу потоа, Белата куќа одржа седница за исламофобија, на која високи претставници на администрацијата се сретнаа со лидерите на муслиманската заедница.
„Ја повикуваме американската администрација да осмисли канцеларија под назив специјален пратеник за следење и борба против исламофобијата“, рече Бејдун, додавајќи дека има слични претставници во Стејт департментот за борба против антисемитизмот.
На 11 септември 2001 година во утринските часови се случија координирани терористички напади на Ал Каеда на Њујорк и Вашингтон, изведени од 19 припадници на Ал Каеда со четири грабнати патнички авиони за трансконтинентални летови од источниот на западниот брег на САД. Два авиона се урнаа во кулите на Светскиот трговски центар во Њујорк, третиот во Пентагон, додека четвртиот авион се урна во округот Сомерсет, Пенсилванија. Во двата напада загинаа околу 3.000 луѓе.
Борбата против Ал Каеда и Осама бин Ладен во Авганистан започна по неполн еден месец по нападот. Осама бин Ладен беше убиен десет години подоцна, на 11 мај 2011 година.
