Servet Günerigök
09 Октомври 2023•Ажурирај: 11 Октомври 2023
ВАШИНГТОН (АА) - Неколку стотици пропалестински демонстранти се собраа на Тајмс Сквер во Њујорк, во знак на поддршка за Палестина, додека од другата страна на улицата десетици поддржувачи на Израел, јавува Анадолу.
Пропалестинските поддржувачи маршираа низ центарот на Менхетен, додека произраелските демонстранти се собраа во близина на израелскиот конзулат во соседството.
Демонстрантите извикуваа слогани „Отпорот е оправдан“ и „Слободна Палестина“, веејќи знамиња и истакнувајќи транспаренти за поддршка на Палестина.
На спротивната страна на улицата се собра група произраелски демонстранти што носеа израелски знамиња.
Некои приврзаници на двете страни вербално се судрија меѓу себе, но полицијата брзо ги раздели.
Десетици полицајци ги обезбедуваа двата собира што завршија мирно.
Гувернерката на Њујорк, Кети Хочул, го осуди пропалестинскиот собир нарекувајќи го „гнасен и морално одвратен“. Градоначалникот на Њујорк, Ерик Адамс, исто така, пропалестинскиот собир го нарече „одвратен“.
„Во време кога во Израел се колат невини луѓе и се киднапираат деца, одвратно е што оваа група екстремисти покажува поддршка за тероризмот. Јас го отфрлам ова. Њујорк го отфрла. Не користете ги нашите улици за ширење омраза“, рече Адамс на платформата X.
Бригадите Ал-Касам во саботата наутро започнаа сеопфатен напад врз Израел наречен „Поплава Акса“. Илјадници ракети беа истрелани од Газа кон Израел, а вооружени групи навлегоа во населбите во регионот.
Групата рече дека нивниот напад бил одговор на израелските напади врз комплексот на џамијата „Ал Акса“ во окупираниот Источен Кудс (Ерусалим) и зголеменото насилство меѓу доселениците.
Најмалку 700 Израелци, од кои 73 израелски војници, загинаа, а повеќе од 2.300 се ранети во нападите, соопшти израелското Министерство за здравство.
Израел возврати со серија воздушни напади врз Појасот Газа, при што загинаа повеќе од 430 Палестинци, а беа повредени најмалку 2.300.
Израелскиот премиер Бенјамин Нетанјаху вети дека ќе ги искористи сите сили на Израел за да ги уништи способностите на Хамас и „да се одмазди за овој црн ден“.
