САД со повик до Израел да прави разлика помеѓу Хамас и палестинските цивили

ВАШИНГТОН (АА) – Соединетите Американски Држави (САД) рекоа дека Израел треба да ги заштити цивилите и да прави разлика помеѓу групата Хамас и палестинските цивили, јавува Анадолу.

„Ние бевме многу јасни со нашите израелски партнери дека цивилите треба да бидат заштитени, дека треба да прават разлика помеѓу терористите на Хамас и палестинските цивили“, рече заменик-портпаролот на Стејт департмент, Ведант Пател, на прашањето на Анадолу дали САД сметаат дека нивните повици до Израел се недоволни во однос на принудувањето на Израел да дејствува во рамките на меѓународното право.

Пател рече дека нема да навлегува во детали за тековните дипломатски разговори, но истакна дека ќе продолжат тоа прашање да го имаат на агендата.

Кога беше прашан дали САД ги поддржуваат таквите акции на Израел и дали се загрижени за тие акции, Пател одговори: „Ние сметаме дека Израел има право да се брани, да ја брани својата безбедност.“

„Сметаме дека тоа што се случи на 7 октомври е нешто што ниту една земја во светот не би можела да го прифати“, рече тој.

Но Пател додаде дека иако Хамас „ги користи цивилите како штит“, САД продолжуваат да сметаат дека е „важно Израел да прави разлика помеѓу терористите на Хамас и палестинските цивили“.

„Државниот секретар (Ентони Блинкен) ќе го стори тоа, а и другите во администрацијата ќе го направат тоа и ќе продолжат да ја водат оваа дипломатија“, додаде тој.

Израел започна воздушни и копнени напади врз Газа по прекуграничниот напад на Хамас на 7 октомври во кој загинаа над 1.400 Израелци. Според податоците на Министерството за здравство во Газа, најмалку 10.022 Палестинци, од кои 4.104 деца и 2.641 жени, загинале за време на немилосрдното бомбардирање на Израел.

Во израелски воздушен напад врз Газа доцна во саботата загинаа четири деца и тројца браќа и сестри на снимателот на Анадолу, Мухамед Алаул.