ИСТАНБУЛ (АА) – За над 100 милиони луѓе низ Соединетите Американски Држави е прогласено црвено предупредување за силно невреме бидејќи моќен циклонски систем со обилни снежни врнежи и силни ветрови им се заканува на регионите на Горниот Среден Запад и Големите Езера, објави денес Еј-би-си њуз, пренесува Анадолу.

Се очекува циклонскиот систем, исто така, да го зголеми ризикот од појава на шумски пожари низ централниот дел на САД, додека во делови од североистокот доцна денес ќе има дожд, грмежи и краткотрајни силни врнежи од снег.

Денес, до вечерните часови, во голем дел од американската сојузна држава Дакота, па сè до северните делови на државата Њујорк се очекуваат врнежи од снег што ќе формираат снежна покривка со висина од 7 до 15 сантиметри.

Се очекува сувите и ветровити временски услови на југот дополнително да ја влошат опасноста од шумски пожари, особено во делови на сојузната држава Небраска, каде што надлежните веќе се борат со големи огнени стихии.

Според извештајот, со поместувањето на циклонскиот систем кон исток во текот на денот, се очекува тој да донесе врнежи од дожд, грмежи и силен ветер во делови од североистокот.