Merve Gül Aydoğan Ağlarcı
19 Јануари 2023•Ажурирај: 23 Јануари 2023
АНКАРА (АА) - Нема поврзаност меѓу одлуката на Соединетите Американски Држави (САД) за потенцијална продажба на борбените авиони Ф-16 на Туркије и кандидатурите за прием во НАТО на Шведска и Финска, изјави денеска американскиот амбасадор во Анкара, јавува Агенција Анадолија (АА).
Говорејќи пред група новинари, амбасадорот Џеф Флејк рече дека САД секогаш барале ангажмани на високо ниво колку што може помеѓу двете земји.
На состанокот на Турско-американскиот стратешки механизам што се одржа вчера во Вашингтон меѓу турскиот министер за надворешни работи, Мевлут Чавушоглу и американскиот државен секретар Ентони Блинкен, Флејк рече дека двете страни „се осврнале на многу важни прашања“.
„Секретарот Блинкен му се заблагодари на министерот за надворешни работи, Чавушоглу, за работата на Туркије [со Украина] за иницијативата за жито, за нејзината силна, постојана поддршка на украинскиот суверенитет и за поддршката што ја дава на НАТО 70 години. Туркије е важна и ценета членка“, рече Флејк.
Во врска со потенцијалната продажба на борбените авиони Ф-16 и сетови за надградба на Ф-16, американскиот амбасадор повтори дека процесот сега е на разгледување пред Конгресот.
Велејќи дека „не постои поврзаност“ меѓу продажбата на Ф-16 и кандидатурите за членство во НАТО на Шведска и Финска, чие одобрение од Туркије се чека, Флејк додаде: „Конгресот на САД инвестира многу во оваа војна за да ѝ помогне на Украина во борбата против руската агресија, и монетарно и водејќи ја оваа коалиција. Тие го гледаат ова како многу важно, но не постои поврзаност.“
„Желбата да се видат Шведска и Финска во НАТО е универзална во Конгресот“, рече тој.
Флејк потоа истакна дека постои технички, односно, одреден број денови кои на (Конгресната) комисија ѝ се дадени да го разгледа ова во процесот на повеќеслојна ревизија... но тоа не се сигурни датуми.
Во октомври, Анкара поднесе барање до Вашингтон за 40 авиони Ф-16 и комплети за модернизација, додека Стејт департментот минатата недела неформално го извести Конгресот за потенцијалната продажба.
Во врска со разговорите на Туркије со сирискиот режим на Асад, Флејк рече: „САД остануваат против ангажирање и нормализирање на односите со режимот на Асад, имајќи го предвид она што тој му го направи на својот народ низ годините. Сè уште сме против тоа.“
Во врска со безбедносните прашања поврзани со северна Сирија, каде што турските власти предупредија на формирање терористички коридор долж сириско-турската граница доколку не се преземе акција, Флејк рече дека разговорите и дијалогот меѓу Туркије и САД продолжуваат.
Туркије долго време изразува противење на американската соработка со терористичката организација ЈПГ/ПКК.
Во својата над 35-годишна терористичка кампања против Туркије, ПКК, која од САД, ЕУ и Туркије е ставена на листата на терористички организации, одговорна е за смртта на повеќе од 40.000 луѓе, меѓу кои и жени и деца. ЈПГ е сириски огранок на ПКК.
