Ali Rezzakoğlu
10 Март 2022•Ажурирај: 10 Март 2022
ТЕХРАН/ АНКАРА (АА) – Рускиот амбасадор во Иран ги повика локалните медиуми да не ја опишуваат војната на неговата земја против Украина како „инвазија“, јавува Агенција Анадолија (АА).
На прес-конференција во Техеран, Леван Џагарјан побара од медиумите да ја наведат руската војна во Украина како „специјална воена операција“ наместо „воена инвазија“.
На прес-конференцијата присуствуваа само неколку ирански медиумски групи.
Москва ја нарекува својата војна која ја започна на 24 февруари како „специјална воена операција“ започната со цел да се денацифира и демилитаризира Украина.
Иран се спротивстави на војната и повика на мирно решение, но исто така вината ја стави во, како што го нарече „експанзионизмот на НАТО предводен од САД“.
Врховниот лидер, ајатолахот Али Хамнеи, минатата недела рече дека кризата е поттикната од политиките на САД и дека Иран го поддржува завршувањето на војната во источноевропската земја.
Војната наиде на меѓународна осуда и доведе до сериозни финансиски санкции кон Москва. Сѐ поголем број мултинационални компании, исто така, целосно или делумно го стопираа бизнисот во Русија.
Најмалку 516 цивили се убиени, а 908 други се повредени во Украина од почетокот на војната, според податоците на ОН.
„Над 2,1 милион Украинци, исто така, побегнаа во соседните земји“, соопшти Агенцијата за бегалци на ОН.
