Русија ја предупреди Грција за испорака на ракети С-300 на Украина

МОСКВА (АА) - Русија денеска ја предупреди Грција да не ја снабдува Украина со ракетни системи за воздушна одбрана С-300 од руско производство, барајќи од Атина да се откаже од таквите „провокативни“ планови, јавува Агенција Анадолија (АА).

Говорејќи на брифинг со новинарите во Москва, портпаролката на Министерството за надворешни работи, Марија Захарова, рече дека трансферот на системите С-300 во Киев ќе биде „грубо кршење“ на руско-грчките меѓувладини договори за воено-техничка соработка и снабдување со воени производи.

„Прекршувањето на договорните обврски неизбежно ќе има последици, а да не зборуваме за слабеењето на одбранбената способност на Грција на полето на воздушната одбрана“, предупреди таа.

Захарова додаде дека Атина, исто така, покажува „целосна рамнодушност“ кон меѓународните ограничувања, според кои се забранува извоз на оружје во регионите каде што тоа може да доведе до кршење на меѓународното хуманитарно право и да придонесе за влошување на конфликтот.

„Пред да биде предоцна – тоа е како совет – можете да се откажете од опасните планови. Уште еднаш, го предупредуваме грчкото раководство за одговорност“, рече таа.

Коментирајќи ги тврдењата на Украина за руската набавка на 250 беспилотни летала од Иран, Захарова рече дека „таквите инсинуации се лаги, обид за ширење неосновани изјави“.

„Ставот за ова прашање постојано се донесуваше до Советот за безбедност на ОН, вклучително и на состанокот на 19 декември, кој беше посветен на спроведувањето на Резолуцијата 2.231 на Советот за безбедност на ОН.

„Немаше испораки што ја прекршуваат оваа резолуција меѓу Иран и Русија и ги повикуваме сите други земји да заземат подеднакво одговорен пристап кон нивните меѓународни обврски“, рече таа.

- Во напад на Африка повреден руски службеник

Осврнувајќи се на наводниот терористички напад во Централноафриканската Република (ЦАР) минатиот петок, во кој беше тешко ранет руски претставник, Захарова рече дека истрагата е во тек.

Со оглед на тоа што МНР на Русија е поврзано со полицијата на ЦАР и запознаено со инцидентот, Захарова рече дека пакетот со експлозивна направа бил доставен од меѓународната поштенска компанија ДХЛ, а неколку вработени во компанијата биле приведени по инцидентот.

„Ја следиме истрагата како и секогаш. Силно ги осудуваме сите терористички дејствија, каде и да се вршат такви грозоморни злосторства“, нагласи таа.

Захарова рече дека Москва очекува „темелна истрага“ од надлежните тела на ЦАР и казна за „авторите“ на извршеното злосторство.

„Би сакала да нагласам дека доколку напорите на западните земји, вклучително и Франција, во Централноафриканската Република вештачки не создадеа негативна, понекогаш хистерична, токсична атмосфера околу руските претставници, специјалисти кои ги извршуваат своите активности во земјата исклучиво на покана на официјалните власти на Централноафриканската Република, тогаш можеби ќе се избегнеа вакви инциденти“, нагласи таа.

Портпаролката ги повика француските власти да размислат за можните последици од „понекогаш неодговорните активности и зборови“.

„Навистина се надеваме и очекуваме дека Париз ќе изрази зборови на сочувство, жалење и осуда во врска со терористичкиот напад, бидејќи темата за Русија во Африка во последно време е толку интересна за него“, рече таа.