Русија тврди дека ја презела контролата врз клучната пристапна точка во Донбас, источна Украина

МОСКВА (АА) - Руските сили ја презеле контролата врз Клешчеевка, клучна пристапна точка до транспортниот центар Бахмут во Донбас, источна Украина, соопшти денес Кремљ, јавува Агенција Анадолија (АА).

Операцијата за заземање на населбата ја изведоа „доброволни одреди за напади“ со поддршка од артилериските и ракетните сили на редовната војска, изјави портпаролот на Министерството за одбрана Игор Конашенков, на брифинг со новинарите во Москва.

„Редовната војска ја зазеде и населбата Лобковоје во југоисточниот регион Запорожје“, додаде Конашенков.

Евгениј Пригожин, шефот на руската приватна воена компанија „Вагнер Груп“, рече дека неговите платеници „целосно ја презедоа контролата“ врз Клешчеевка, клучното предградие на градот Бахмут преку кое украинските војници се снабдуваат со оружје и воена опрема.

Пригожин тврди дека „жестоки битки“ продолжиле околу Клешчеевка, при што Украинците цврсто се бореле за секој метар земја.

„Спротивно на различните мислења дека ВСУ (Вооружените сили на Украина) бегаат од Артјомовск (руското име за Бахмут), тоа не е така. ВСУ работат јасно, непречено. Имаме многу што да научиме од нив. Но, во секој случај, единиците на ПВК Вагнер напредуваат метар по метар. Населеното место Артјомовск ќе биде преземено“, рече тој.