Русија стави вето на резолуцијата на ОН што ги поврзува климатската криза и глобалната безбедност

АНКАРА

Русија стави вето на резолуцијата на Советот за безбедност на ОН што формално би ги поврзала климатските промени и глобалната безбедност, пренесува Агенција Анадолија (АА).

„Советот за безбедност денеска, на спорниот состанок, ја отфрли нацрт-резолуцијата што би го интегрирала безбедносниот ризик поврзан со климата како централна компонента на стратегиите на Обединетите нации за спречување конфликти, кои имаат за цел да помогнат во спротивставувањето на ризикот од повторување на конфликтот“, се вели во соопштението на ОН.

Нацрт-резолуцијата, поддржана од Нигер и Ирска, доби 12 гласа „за“, Индија и Русија беа против, а Кина воздржана.

Гласањето следуваше по отворената дебата на Советот за безбедност на ОН на 9 декември, во која речиси 60 говорници предупредија дека луѓето и земјите најранливи на климатските промени, исто така, се најранливи на регрутирање терористи и насилство.

Василиј Небензја, рускиот амбасадор во ОН, рече дека нацрт-резолуцијата е „неприфатлива“, истакнувајќи дека „ова е обид да се одвлече вниманието од вистинските длабоко вкоренети причини за конфликти во некои земји на агендата“.

„Ваквите дебати треба да се водат на соодветниот форум како што е Рамковната конвенција на Обединетите нации за климатски промени“, додаде тој.

Бирн Насон, постојаниот претставник на Ирска во ОН, изрази жалење поради употребата на вето за блокирање на, како што ја нарече, „револуционерната“ резолуција.

„Отфрлањето од страна на Советот е остар потсетник за потребата од реформирање на органот“, додаде таа.