Русија „позитивно“ ја гледа подготвеноста на Зеленски за преговори

ИСТАНБУЛ (АА) - Русија ја гледа подготвеноста на украинскиот претседател Владимир Зеленски за преговори во „позитивна“ светлина, соопшти денес Кремљ, јавува Анадолу.

Говорејќи пред новинарите во главниот град Москва, портпаролот Дмитриј Песков рече дека Русија ги оценува неодамнешните изјави на Зеленски „позитивно“, но дека сè уште не е јасно со кого Москва ќе преговара.

„Прашањето е со кого да се седне. Засега, правната забрана на украинскиот претседател за разговори со руската страна останува на сила“, рече Песков, мислејќи на декретот на Зеленски од 2022 година за забрана на преговори со рускиот претседател Владимир Путин.

Тој истакна дека „главниот пристап е позитивен, но нијансите сè уште не се променети“.

Американскиот претседател Доналд Трамп вчера, во своето прво обраќање пред Конгресот, рече дека добил писмо од Зеленски во кое се изразува подготвеноста на Киев да седне на преговарачка маса во потрага по „траен мир“.

Подоцна украинската амбасадорка во САД, Оксана Маркарова, на Фејсбук напиша дека Трамп ја прочитал претходната порака на Зеленски на Х, во која тој изразува жалење за јавната расправија на состанокот во Белата куќа минатата недела, велејќи дека не поминала како што планирале.

Зеленски, Трамп и потпретседателот Џеј-Ди Венс на 28 февруари во Овалната соба си разменија жестоки зборови. Откако Зеленски изрази сомневање дека дипломатијата може да резултира со мир, Трамп и Венс го критикуваа украинскиот лидер дека не е благодарен за поддршката на САД.