Русија побара од борците на „Вагнер“ да се вратат во базите

ИСТАНБУЛ (АА) - Русија денес прати апел до борците на паравоената група „Вагнер“ да се вратат во своите бази, пренесува Анадолу.

Преку соопштение, руското Министерство за одбрана истакна дека челникот на „Вагнер“, Евгениј Пригожин, ги измамил борците да влезат во „криминална авантура“ и „вооружен бунт“, а Кремљ издаде наредба за негово апсење поради поттикнување бунт.

„Апелираме до борците од јуришните одреди 'ПВК Вагнер'. Бевте измамени во криминалната авантура на Пригожин и учеството во вооружен бунт“, се вели во соопштението.

Руската страна понатаму рече дека многу борци на „Вагнер“ ја „сфатиле својата грешка“ и побарале помош да се вратат во своите бази.

„Ве молиме, бидете претпазливи и стапете во контакт со претставниците на руското Министерство за одбрана или со агенциите за спроведување на законот колку што е можно поскоро. Ја гарантираме безбедноста на сите“, се додава.

Пригожин рано утрово изјави дека неговите сили од Украина преминале во рускиот град Ростов.

Тензиите меѓу Кремљ и „Вагнер“ ескалираа откако Пригожин ги обвини руските сили за напади врз неговите платеници.

Русија доцна синоќа ги негираше тие тврдења и издаде наредба за апсење на Пригожин.

Пригожин последните месеци континуирано ги обвинуваше руското Министерство за одбрана и министерот за одбрана Сергеј Шојгу дека не ѝ испорачувале доволно оружје на паравоената група.