Рубио: САД предложија план од три чекори за ставање крај на војната во Украина

ИСТАНБУЛ / МОСКВА (АА) - Државниот секретар на Соединетите Американски Држави (САД), Марко Рубио, денес предложи план од три чекори за ставање крај на војната во Украина, јавува Анадолу.

„Планот вклучува состаноци на високо ниво во кои учествуваат Украина и европските земји и отстапки од сите страни“, изјави Рубио за време на прес-конференцијата во Саудиска Арабија.

Рубио исто така нагласи дека Русите се подготвени да се вклучат во сериозен процес, нарекувајќи ја средбата прв чекор од „долго и тешко патешествие“.

Тој ја истакна потребата од праведно, трајно и одржливо решение прифатливо за сите инволвирани страни.

Предлогот следуваше по неодамнешните американско-руски разговори со цел да се намалат тензиите и да се најде пат кон мирот.

Разговорите следуваа по телефонскиот разговор на Трамп минатата недела со рускиот претседател Владимир Путин, што означи чекор кон подобрување на односите и подготовка за потенцијален самит меѓу САД и Русија.

Разговорите, чиј домаќин беше Саудиска Арабија со цел поддршка на дипломатскиот дијалог, ја означуваат првата средба меѓу руските и американските дипломати од почетокот на војната во Украина на 24 февруари 2022 година, пред речиси три години.

Руската делегација ја предводеше министерот за надворешни работи Сергеј Лавров, а во неа беа претседателските советници Јуриј Ушаков и Кирил Дмитриев и шефот на Рускиот фонд за директни инвестиции.

Државниот секретар Марко Рубио ја предводеше американската делегација, придружуван од советникот за национална безбедност, Мајк Валц, и од Стив Виткоф, специјалниот пратеник за Блискиот Исток.