Путин ја одложи мобилизацијата на студентите, докторандите и лекарите

МОСКВА (АА) - Рускиот претседател Владимир Путин денеска потпиша уредба со која се одложува мобилизацијата на студентите, докторандите и лекарите резиденти, јавува Агенција Анадолија (АА).

Одложувањето важи за редовните и вонредните студенти на државните универзитети, колеџи и научни организации, во иновативните научни и технолошки центри и во духовните и едукативни организации.

Според уредбата, одложување на воената мобилизација добија редовните и вонредните студенти на државно акредитираните програми во државните образовни или научни организации.

Како што објасни Путин, новата уредба ги опфаќа и приватните универзитети со државна акредитација.

Претходно, рускиот претседател потпиша уредба со која се дозволува ослободување од мобилизација на повеќето студенти на универзитетите и колеџите.

На 21 септември Путин прогласи делумна мобилизација во земјата со која се опфатени околу 300.000 лица на возраст меѓу 18 и 50 години.

На 4 октомври, рускиот министер за одбрана, Сергеј Шојгу, рече дека повеќе од 200.000 лица се пријавиле за служба во рамките на делумната мобилизација.