Burç Eruygur
28 Ноември 2025•Ажурирај: 29 Ноември 2025
ИСТАНБУЛ (AA) – Рускиот претседател Владимир Путин денес изјави дека идните преговори меѓу Москва и Вашингтон би можеле да резултираат со можен самит во Будимпешта, главниот град на Унгарија, јавува Анадолу.
„Доколку нашите преговори (со САД) доведат до користење на местото на одржување на состанокот во Будимпешта, би бил многу среќен за ова и би сакал да ви се заблагодарам за вашата подготвеност да помогнете“, рече Путин во воведниот говор за време на состанокот во Москва со Виктор Орбан, премиерот на Унгарија.
Путин, исто така, му се заблагодари на Орбан за неговата подготвеност да биде домаќин на самитот Русија - САД, објавен од американскиот претседател Доналд Трамп минатиот месец, додавајќи дека предлогот за одржување на откажаните разговори во Будимпешта дошол од неговиот американски колега.
Претходно, Орбан објави видео на американската платформа за социјални медиуми Фејсбук дека ќе ја посети Москва, велејќи дека целта на разговорите е „да се обезбеди снабдување со енергија на Унгарија за зимата и следната година, по прифатлива цена“.
Тој потсети дека почетокот на месецов го посетил и Вашингтон, барајќи изземање за Унгарија од американските санкции наметнати за рускиот нафтен и гасен сектор.
Трамп во октомври воведе санкции против двете најголеми руски нафтени компании – Роснефт и Лукоил, како и 34 нивни подружници, во обид да го зголеми притисокот врз Москва додека се обидува да посредува за мировен договор за ставање крај на војната меѓу Русија и Украина.
Орбан често ги критикува Брисел и европското финансирање за Украина, повикувајќи на дипломатско решение и поддржувајќи го актуелниот мировен предлог на Трамп.
Будимпешта претходно беше избрана како домаќин на евентуалниот самит Русија – САД за решавање на конфликтот, но состанокот беше откажан, откако Трамп порача дека не сака „залудна средба“.
- Билатерални односи
Путин говореше и за руско-унгарските односи, велејќи дека меѓу двете земји се развила атмосфера што им овозможува „отворено да разговараат и да дебатираат за секое прашање“, и покрај разликите во ставовите, особено во меѓународните прашања.
„Ова ни дава можност не само да разговараме, туку и да бараме решенија за секој проблем“, додаде рускиот претседател.
Тој изрази жалење за падот на трговската размена меѓу двете земји, што Путин го припиша на „надворешни ограничувања“, но нагласи дека постојат добри перспективи.
„Оваа година забележуваме раст – мал, скромен, но сепак – над 7 %“, истакна Путин, пофалувајќи ја соработката во енергетскиот сектор.
Орбан, пак, оцени дека стабилните енергетски испораки од Русија се „основа на енергетската безбедност на Унгарија“, додавајќи дека Будимпешта ги цени „стабилноста и предвидливоста“ на тие испораки.
„Унгарија е заинтересирана да го одржи енергетскиот дијалог со вашата земја и денес би сакал детално да ги разгледаме овие прашања“, рече унгарскиот премиер.
Тој посочи дека Унгарија, како сосед на Украина, ги чувствува сите последици од војната, нагласувајќи дека земјата е заинтересирана за мир и се надева дека новообјавените иницијативи ќе придонесат кон тоа.
„Денешната средба ми дава можност, господине претседателе, да потврдам дека Унгарија е подготвена да обезбеди платформа за вакви преговори и да помогне во нивното успешно финализирање“, додаде Орбан.
