Путин: Акцијата во Украина е „единствената правилна одлука“

МОСКВА (АА) - Русија ја започна својата „специјална воена операција“ во Украина за да спречи упад на нејзина територија и тоа беше „единствената правилна одлука“, изјави денес претседателот Владимир Путин, јавува Агенција Анадолија (АА).

Обраќајќи се на 77. Ден на победата на Црвениот плоштад во Москва, одбележан по повод прославата на победата на Советскиот Сојуз над нацистичка Германија во Втората светска војна, Путин рече дека војската се бори за луѓето во Донбас и за безбедноста на Русија.

„Минатата година им предложивме на земјите од НАТО да потпишат договор за безбедност, но тие не сакаа да нè слушнат, имаа сосема други планови и се подготвуваше напад на Крим“, рече тој. „Алијансата започна воен развој на териториите во непосредна наша близина... судирот со неонацистите беше неизбежен“.

Рускиот претседател, исто така, со едноминутно молчење им оддаде почит на оние кои „ги дадоа своите животи за татковината“.

„Смртта на секој војник е тага за сите нас, ќе направиме сè за да им помогнеме на семејствата и децата на војниците убиени во Украина“, рече Путин.

Москва ја нарекува својата војна против Украина, која започна во февруари, „специјална воена операција“ за „демилитаризација“ и „денацификација“ на Украина. За западните земји, сепак, тоа е војна на агресија и тие како одговор воведоа строги санкции.

Воената акција остави илјадници мртви и ранети, а над 5,7 милиони луѓе во Украина беа принудени да побегнат во странство.