Протест на превозниците: Камиони формираа километарски колони на границата меѓу БиХ и Хрватска

СВИЛАЈ (АА) — Стотици камиони го блокираа Граничниот премин „Свилај“ во Босна и Херцеговина, формирајќи километарски редици, откако превозниците протестираа против правилата на Европската Унија (ЕУ) што го ограничуваат нивниот престој во Шенген-зоната на 90 дена. Патничкиот сообраќај се одвива непречено, додека камионите се паркирани покрај патот, јавува Анадолу.

Блокадите на граничните премини се забранети во ентитетот Република Српска, Западнохерцеговскиот и Унско-Санскиот Кантон, но такви мерки не се преземени во Посавскиот Кантон.

Превозниците предупредуваат дека БиХ би можела да се најде во ситуација каде што увозот и извозот на стоки ќе бидат сериозно загрозени, а синџирите на снабдување ќе бидат доведени во прашање, освен ако итно не се започнат директни разговори со институциите на Европската Унија и соседните земји.

Борјана Кришто, претседавачката со Советот на министри на БиХ, претходно им предложи на шефовите на владите на земјите од Западен Балкан да започнат заедничка иницијатива кон ЕУ со цел координирано решавање на проблемите во меѓународниот патен транспортен сектор во регионот.

Превозниците велат дека долго време се соочуваат со проблеми на границите на ЕУ поради спроведувањето на регулативата со која се наметнува правилото за престој од 90 дена во период од 180 дена. Кон крајот на јануари, претставници на превозниците од регионот на Западен Балкан протестираа на границите на ЕУ за да го изразат своето незадоволство од правилото, но тоа не доведе до никакви промени во европските регулативи.

Превозниците бараат од домашните власти укинување на акцизата за горивата, враќање на ДДВ за меѓународен транспорт, а од Управата за индиректно оданочување да ги спроведе претходно договорените мерки со цел забрзување на процедурите и намалување на времето на чекање на границите.

Тие истакнуваат дека се принудени на блокада поради, како што наведуваат, дискриминаторските правила што го ограничуваат нивниот престој во ЕУ, иако ги имаат сите потребни дозволи и лиценци и се само во транзит низ ЕУ.