Привремената претседателка на Боливија ја повлече кандидатурата за избори

БОГОТА

Привремената претседателка на Боливија, Жанин Анез, вчера најави дека ја повлекува нејзината кандидатура за претседателските избори на 18 октомври, јавува Агенција Анадолија (АА).

„Денеска ја повлекувам мојата кандидатура за претседател на Боливија, за да се грижам за демократијата. Не е жртвување, тоа е чест“, изјави Анез во видеоснимка која ја објави на Твитер.

„Ако не ги здружиме силите, Ево Моралес ќе се врати насила. Доколку не ги здружиме силите, демократијата губи. Доколку не ги здружиме силите, диктатурата се враќа“, рече таа, осврнувајќи се на поранешниот претседател Ево Моралес, кој сега живее во егзил во Аргентина.

Конзервативната лидерка го најави своето повлекување откако две анкети ја оставија зад водечките кандидати, социјалистот Луис Арсе и центристот Карлос Меса. Таа беше на четвртото место во анкетите за време на критиките за нејзиното справување со епидемијата на коронавирусот.

По оставката на Моралес во ноември 2019 година, Анез се прогласи за привремена претседателка на земјата без да има кворум во Парламентот.

Анез вети дека ќе одржи нови избори што е можно побрзо кога ќе дојде на власт, но ги одложи изборите, првично закажани за 3 мај поради пандемијата, за што опозицијата ја обвини дека сака да го одложи гласањето за да ги зголеми нејзините изгледи за избор.