Burç Eruygur
22 Јануари 2023•Ажурирај: 23 Јануари 2023
ИСТАНБУЛ (АА) - Претседателот на Долниот дом на рускиот Парламент, Државната дума, денес предупреди дека испорачувањето тешко оружје за Украина од страна на западните земји ќе доведе до „глобална катастрофа“, пренесува Агенција Анадолија (АА).
„Ако Вашингтон и земјите од НАТО испорачаат оружје што ќе се користи за напади врз цивилни градови и за обиди за заземање на нашите територии, како што се закануваат, тоа ќе доведе до одмазднички мерки со користење на многу помоќно оружје“, порача Вјачеслав Володин преку Телеграм.
Володин ги повика членовите на американскиот Конгрес, како и пратениците во германскиот Бундестаг, француското Национално собрание и другите европски парламенти, „да ја сфатат својата одговорност кон човештвото“.
Соединетите Американски Држави неодамна соопштија дека ќе ја поддржат Украина доколку започне операција за враќање на полуостровот Крим, кој Русија нелегитимно го анектира во 2014 година. Москва, исто така, анектира четири региони во источна Украина минатата година по одржаните, како што Западот ги нарече, лажни референдуми.
„Со своите одлуки, Вашингтон и Брисел го водат светот кон ужасна војна: до сосема поинаква воена акција од денешните, кога се изведуваат напади исклучиво врз воената и критичната инфраструктура што ја користи режимот во Киев“, истакна тој.
Володин рече дека политичарите треба да разберат дека таквите одлуки може да завршат со „глобална трагедија“ која ќе ги уништи нивните земји, поради „технолошката супериорност на руското оружје“.
Укажувајќи дека Русија нема да се двоуми да употреби нуклеарно оружје во судирот, Володин истакна дека безбедноста на неговиот народ и територијалниот интегритет се под закана.
„Аргументите дека нуклеарните сили претходно не користеле оружје за масовно уништување во локални конфликти се неодржливи бидејќи овие држави не се соочиле со ситуација каде што постои закана за безбедноста на нивните граѓани и територијалниот интегритет на земјата“, рече тој.
Околу 50 министри за одбрана и високи претставници на западните земји во петокот присуствуваа на состанокот на Контакт-групата за Украина во Воздухопловната база Рамштајн во Германија, каде сојузниците на Киев ветија продолжување на воената поддршка за земјата, но не успеаја да се согласат за испраќање тенкови.
