Mahmut Geldi
15 Февруари 2022•Ажурирај: 15 Февруари 2022
ИСТАНБУЛ (АА) - Престолонаследникот на Абу Даби, Мухамед бин Зајед Ал Нахјан, изјави дека Обединетите Арапски Емирати (ОАЕ) се подготвени да го зајакнат своето партнерство со Турција, пренесува Агенција Анадолија (АА).
Официјалната агенција на Обединетите Арапски Емирати, ВАМ, објави дека турскиот претседател Реџеп Таип Ердоган и Бин Зајед оствариле средба во палатата „Каср ал Ватан“ во Абу Даби.
На состанокот е разговарано за билатералната соработка и за регионалниот развој.
Како што се наведува, Бин Зајед во текот на состанокот со Ердоган изразил желба оваа важна посета да ја зајакне соработката и да биде почеток на изградбата на нов просперитетен период во заедничката работа.
Бин Зајед му ги пренесе на Ердоган поздравите на претседателот на ОАЕ, шеикот Калифа бин Зајед Ал Нахјан и им посака на Турција и на нејзиниот народ стабилност и раст.
Бин Зајед, кој ѝ се заблагодари на Турција на заземениот пријателски став против нападите на Хусите од Јемен врз ОАЕ, наведе дека за време на неговата посета на Анкара во ноември 2021 година е потпишан меморандум за разбирање и дека договорите ја сочинуваат основата на големото економско и трговско партнерство меѓу двете земји.
„ОАЕ сакаат да го зајакнат своето партнерство со Турција“, рече Бин Зајед. Како што истакна, двете земји се исто така подготвени да го зголемат обемот на трговска размена.
Бин Зајед истакна дека неговата земја придава значење на соработката со Турција за заедничка борба против разните потешкотии во регионот.
