Предупредување од Русија американското оружје во Украина да не се користи против цели на руска територија

МОСКВА (АА) - Портпаролот на Кремљ, Дмитриј Песков, истакна дека употребата на американско оружје испратено во Украина против цели на руска територија негативно ќе влијае на ситуацијата, пренесува Агенција Анадолија (АА).

Песков даде изјава за медиумите за актуелните случувања.

Оценувајќи ја испораката на оружје од САД за Украина, Песков рече: „Тие продолжуваат насилно да ја полнат Украина со најмодерно оружје. Не сакам хипотетички да зборувам за апсолутно непожелните и многу непријатни сценарија доколку тоа оружје се употреби против цели на наша територија. Ова значително негативно ќе ја промени ситуацијата.“

Песков нагласи дека испраќањето помодерно оружје во Украина нема да ги промени руските „параметри на специјална воена операција“.

Тој истакна дека во секој случај ќе ги постигнат своите цели, и дека пратките со оружје само ќе ѝ нанесат поголема болка на Украина.

Нагласувајќи дека нема да се продаде ништо што ќе биде на штета на Русија, Песков рече: „Во секој случај, сѐ ќе биде регулирано од пазарот, и покрај вештачките тешкотии што ги предизвикуваат санкциите. Секако, доколку некаде се намали побарувачката, на друго место ќе се зголеми. Протокот повторно ќе биде пренасочен и се бараат оптимални услови.“

Песков истакна дека во таканаречените републики Доњецк и Луганск и регионите Керсон и Запорожје треба да се создадат услови за организирање референдум за приклучување кон Русија.

„Кремљ не донесува одлука за референдумот. Ние повеќепати кажавме дека луѓето што живеат таму треба сами да си ја одредат судбината. Прво, одлуката треба да ја донесат тие луѓе. Второ, се разбира, неопходно е да се создадат соодветни услови за тоа“, рече тој.

Песков, меѓу другото, додаде дека не може да се зборува за референдум во конфликтни услови.