Повлекувањето на водата го откри степенот на катастрофата во Долна Јабланица, продолжува потрагата по жртвите

ДОЛНА ЈАБЛАНИЦА (АА) - Со повлекување на дел од водата и отстранувањето на првиот слој насобран материјал, кал и камења, утринава на виделина излезе големината на катастрофата што ја зафати Долна Јабланица, најпогоденото подрачје од поплавите во Босна и Херцеговина, известува Анадолу.

Екипите на вооружените сили на Босна и Херцеговина, цивилна заштита на ентитетите и кантоните, планинската спасувачка служба и бројни доброволци се обидуваат во најкус можен рок да ги отстранат последиците од катастрофата користејќи и тешка механизација.

Мештаните од Долна Јабланица кои изгубија соседи, роднини и имот, денеска ја посетија уништената населба со надеж дека барем некој од исчезнатите ќе биде пронајден жив.

Младен Кулиќ, лидер на тимот на УСАР на Републиканската управа за цивилна заштита на Босна и Херцеговина од ентитетот Република Српска информираше дека вчера во попладневните часови во Долна Јабланица пристигнале десет припадници на РУЦЗ, од кои седум членови на спасувачката екипа за спасување од урнатини и тројца оператори со тешка механизација.

Тој рече дека според првичните податоци на оваа локација има околу 15-16 жртви, но оваа бројка сѐ уште не е официјално потврдена или конечна, а потрагата по исчезнатите продолжува во делот на локацијата под самиот каменолом.

„Во подножјето на самата локација, каде што е езерото, сѐ уште има жртви во возилата и објектите“, рече Кулиќ.

Потсетувајќи дека во февруари 2023 година бил дел од спасувачките тимови по разорните земјотреси во областа Кахраманмараш, во Туркије, Кулиќ рече дека застрашувачката ситуација видена во Туркије делумно може да се види и во Долна Јабланица.

„Со оглед на тоа дека како и во земјотресите, бранот поплави ги разори и згради кои се целосно уништени, тука ситуацијата делумно потсетува на катастрофата во Туркије, во Кахраманмараш каде што бевме“, рече Кулиќ.

- Помош даваат и градежни компании

Со камиони и тешка механизација на теренот пристигнаа компании од БиХ и Туркије, како што се „Босман“, „ХГГ“ и „Џенгиз Иншаат“.

„ХГГ“ и „Џенгиз Иншаат“ се во Долна Јабланица со вкупно девет камиони и неколку вида на тешка механизација.

Шефот на Секторот за односи со јавноста на Владата на Херцеговско-неретванскиот кантон, Дарко Јука, денес потврди дека 13 лица загинале како последица од свлечишта, одрони и поплави во тој кантон.