Палестинското движење Хамас објави дека нема намера да учествува во новата рунда преговори за прекин на огнот во Газа

КАТАР (АА) - Палестинското движење Хамас објави дека нема намера да учествува во новата рунда преговори за прекин на огнот во Газа што треба да се одржи утре во Доха, јавува Анадолу.

Тие додаваат дека се посветени на постојниот предлог.

Според Хамас, новите преговори ќе му овозможат на Израел да постави нови услови и да продолжи со нападите.

„Хамас е посветен на предлогот што му беше претставен на 2 јули, врз основа на резолуцијата на Советот за безбедност на Обединетите нации и говорот на Бајден, а движењето е подготвено веднаш да започне дискусии за механизмот на неговото спроведување“, изјави висок претставник на Хамас.

САД претходно изразија очекување дека утре ќе се одржат разговори во катарската престолнина Доха и дека сè уште е можен договор за прекин на огнот.

Американскиот портал Аксиос објави дека американскиот државен секретар Ентони Блинкен го одложил патувањето на Блискиот Исток што требаше да го започне во вторник.

Ситуацијата на Блискиот Исток се заостри по атентатот на политичкиот лидер на Хамас, Исмаил Ханије, во Техеран и на еден од водечките команданти на Хезболах, Фуад Шукр, во Бејрут.

Иран, кој за убиството на Ханије го обвинува Израел, кое Израел не го негира, продолжува со намерите за одмазда.

Во меѓувреме, висок ирански функционер денес објави дека Техеран, заедно со сојузниците, како либанското движење Хезболах, ќе изврши директен напад доколку преговорите за прекин на огнот во Газа не успеат или ако смета дека Израел одолговлекува со преговорите.

Денешната одлука на Хамас може да доведе до напад од Иран, а со тоа и до нова ескалација на конфликтот на Блискиот Исток.