Палестинската Влада: Израелскиот напад на Рафа би значел целосно раселување на палестинскиот народ

РАМАЛА (АА) - Палестинската Влада објави дека израелскиот копнен напад во Рафа, во Појасот Газа, ќе значи „целосно раселување на палестинскиот народ“, пренесува Анадолу.

Како што јави палестинската новинска агенција ВАФА, нападот врз Рафа би бил уште еден масакр врз Палестинците.

„Воена операција на Рафа би значела нов масакр на целиот наш народ и целосно раселување на нашиот народ“, се наведува во соопштението.

Палестинската Влада ги повикува Соединетите Американски Држави (САД) и меѓународната заедница брзо да интервенираат и да преземат одговорност за да спречат таков напад.

„Го одбиваме раселувањето на Палестинците и тоа е нашата црвена линија“, се наведува во соопштението.

Израелскиот премиер Бенјамин Нетанјаху вчера го одобри планот за воена операција во Рафа, во јужниот дел на Појасот Газа.

Канцеларијата за медиуми на израелскиот премиер објави соопштение по седницата на израелскиот воен кабинет во врска со одбивањето на понудата на Хамас и одобрувањето на нападот врз Рафа. Во соопштението се наведува дека Нетанјаху го одобрил планот на израелската војска за напад на Рафа во јужниот дел на Газа.

„Војската се подготвува за операција и евакуација на (цивилното) население“, беше наведено.

Соопштено беше и дека Нетанјаху ја одбил најновата понуда на Хамас во врска со договорот за прекин на огнот и размена на заробеници, наведувајќи дека условите се „сè уште ирационални“.

Одобрувањето на нападот на Рафа се случи и покрај предупредувањата од меѓународната заедница, вклучително и САД и Египет, да не се влегува во Рафа, каде што моментално се засолнети околу 1,5 милиони раселени Палестинци.

Хамас во четвртокот соопшти дека доставил предлог за прекин на огнот и договор за размена на заробеници со Израел до посредниците во Катар и Египет.

Нетанјаху го отфрли последниот предлог на Хамас за прекин на огнот, нарекувајќи го „апсурден“.