Орбан: На ЕУ ѝ треба нова стратегија за справување со Руско-украинската војна

ВИЕНА (АА) - Унгарскиот премиер Виктор Орбан изјави дека на Европската Унија (ЕУ) ѝ треба нова стратегија за да се справи со Руско-украинската војска и да се фокусира на мировните преговори и подготвување мировни предлози наместо на победа, јавува Агенција Анадолија (АА).

„Нема да има мир без промена на стратегијата. Не можеме да решиме никаков проблем без мир“, рече Орбан на прес-конференцијата со австрискиот канцелар Карл Нехамер во Виена.

Орбан тврдеше дека Украина се бори против Русија со поддршка на НАТО и дека војната не може да се добие со овој метод.

Тој рече дека доколку не се преземат чекори за мир, ЕУ може да се соочи со воена економија.

„Доколку дојде до пад на економијата, тоа ќе ги зголеми стапките на невработеност што ќе ни донесе сериозни проблеми во однос на економската и политичката стабилност“, предупреди тој.

Тој понатаму рече дека не е можно да се дестабилизира Москва со санкции.

„Ставот дека ЕУ ќе ја одржи политичката стабилност без да доживее економски проблеми, и покрај санкциите, не е соодветна стратегија“, истакна Орбан.

Тврдејќи дека арапските земји, Индија и Кина не се на страната на ЕУ во однос на нејзината стратегија, тој рече: „Како Унгарија, ние велиме дека оваа стратегија треба да се промени.“

Орбан претходно изјави дека Унгарија не сака да го поддржи ембаргото на ЕУ или ограничувањата за увоз на руски гас како дел од пакетот санкции на Блокот против Москва поради војната.

Тој, сепак, нагласи дека Унгарија ги почитува сите одлуки на ЕУ за санкции против Русија, додавајќи дека на изјавите на Брисел за заштедите на природен гас или количеството гас што ќе го складира или користи една земја, не се реагира позитивно.

Тој рече дека секоја земја треба да носи свои одлуки во врска со своите енергетски потреби.

Нехамер изјави дека Унгарија е важен сојузник за Австрија, особено во однос на безбедноста.

Тој рече дека покрај различните тековни проблеми, сериозно е и прашањето за нерегуларната миграција и дека на тоа тесно соработуваат со Будимпешта, но дека е потребна поинаква стратегија.

Укажувајќи на важноста Австрија, Унгарија и Србија да се здружат за да го решат проблемот со нерегуларната миграција, Нехамер рече дека треба да се преземат чекори против нерегуларните мигранти концентрирани на границите на овие земји на миграциската рута.

Критикувајќи ги неодамнешните забелешки на Орбан за миграцијата во кои тој зборуваше против создавањето „луѓе од мешана раса“ во Европа, Нехамер рече: „Ние се спротивставуваме и остро ја осудуваме секоја изјава што би го нормализирала... расизмот или антисемитизмот.“

Орбан, сепак, ги бранеше своите забелешки. „Понекогаш се случува да зборувам на начин што може да биде погрешно разбран... Ставот што го застапувам е културна и цивилизациска гледна точка“, рече тој.

Истакнувајќи дека неговата земја ќе продолжи да ги штити своите граници од нерегуларната миграција, Орбан рече дека 100.000 нерегуларни мигранти ќе дојдат во Австрија доколку Унгарија и Србија правилно не ги заштитат своите граници.