ОН ќе го намалат персоналот за хуманитарна работа за 20 % поради недостиг на финансии

Обединетите нации (ОН) денес потврдија дека Канцеларијата за координација на хуманитарни прашања (OCHA) ќе ја намали вкупната работна сила за 20 отсто поради недостиг од финансиски средства, јавува Анадолу.

Шефот за хуманитарна помош на ОН, Том Флечер, испрати писмо до персоналот на OCHA доцна синоќа, велејќи: „Нашите партнери - невладините организации и хуманитарното семејство на ОН - се тешко погодени. И ние сме погодени: јаз во финансирањето во 2025 година од речиси 60 милиони долари. Мора да го решиме ова за да ја заштитиме нашата мисија.“

„Како резултат на тоа, ќе намалиме повеќе од 20 високи позиции во централата и во нашата земја и регионалните канцеларии. Ќе достигнеме сооднос 70/30 помеѓу земјата и регионалните канцеларии и седиштето. Ќе ја намалиме вкупната работна сила за 20 проценти“, рече Флечер.

Прашан за писмото, портпаролот на ОН, Стефан Дужарик, на прес-конференција рече: „Ова се должи на намалувањето на финансирањето, а не на намалувањето на потребите“.

„Некои од намалувањата дојдоа од САД. Некои дојдоа од други земји“, истакна Дужарик, додавајќи дека „изворот на финансирање на ОН е многу транспарентен, особено за нашите хуманитарни колеги“.

Минатиот месец, Меѓународната организација за миграции (ИОМ) објави структурни приспособувања во своите глобални операции поради намалувањето на проценетите донаторски средства за годината за 30 отсто, вклучително и значителни кратења на проектите финансирани од САД низ светот.

Над 6.000 од персоналот низ светот ќе бидат погодени од недостигот на финансирање, при што организацијата ќе го намали и бројот на вработени во седиштето за околу 20 %, или преку 250 вработени, наведе ИОМ.

Кратењата доаѓаат во време на напорите на администрацијата на Доналд Трамп да ја елиминира УСАИД, која финансира хуманитарни програми низ светот, како и други услуги со кои им се помага на луѓето и во САД и пошироко.

Критичарите велат дека едностраното прекинување на финансирањето од страна на Трамп е незаконски, бидејќи за стопирање на парите или елиминирање на владина агенција е потребен акт на американскиот Конгрес.