ОН го осудија израелското убивање новинари во Газа

ЖЕНЕВА (АА) - ОН ја критикуваа израелската војска за намерно гаѓање новинари во Газа, велејќи дека новинарите никогаш не смее да бидат цел додека ги извршуваат своите должности да ја информираат јавноста и да придонесуваат за одговорност, јавува Анадолу.

Портпаролот на Канцеларијата за човекови права на ОН, Тамин ал-Китан, писмено одговори на прашањата на Анадолу во врска со наводите за намерно и систематско напаѓање новинари од страна на Израел поради неговите тековни напади врз Газа.

„Загрижени сме од информациите што значително сугерираат дека палестинските новинари во Газа можеби директно ѝ биле цел на израелската армија додека ја извршувале својата работа, а тоа би претставувало воено злосторство“, рече Ал-Китан.

Тој нагласи дека новинарите што известуваат од конфликтните зони се сметаат и заштитени се како цивили според меѓународното хуманитарно право.

Бројот на новинари убиени во нападите на Израел врз Газа од 7 октомври 2023 година досега достигна 211.

И покрај прекинот на огнот што стапи на сила на 19 јануари, израелската армија продолжи со големи напади утрото на 18 март.

„Никогаш не смее да бидат цел бидејќи тие ги извршуваат своите мисии за информирање на јавноста и придонесуваат за одговорност“, рече тој.

Истакнувајќи дека намерното напаѓање новинари претставува кршење на правото на живот според меѓународното хуманитарно право, Ал-Китан, исто така, посочи дека одбивањето на Израел да дозволи странски новинари во Газа - освен под ограничени и контролирани околности - претставува сериозно кршење на правото на пристап до информации.

Тој нагласи дека Израел е итно обврзан целосно да го почитува меѓународното хуманитарно право за време на конфликти.

Ова вклучува почитување на принципот на разлика помеѓу цивили и борци и преземање на сите можни мерки за заштита на цивилите од напади.

„Мора да се спроведат брзи, темелни, независни, непристрасни и ефективни истраги за сите наводни сериозни прекршувања од страна на израелските сили, при што сторителите ќе бидат повикани на одговорност и на жртвите ќе им се обезбеди обесштетување.“

„Третите земји мора да го искористат своето влијание за да спречат кршење на меѓународното право од страна на страните во конфликтот во Газа, да се воздржат од овозможување такви прекршувања и да ги исполнат своите обврски според меѓународното право, да преземат чекори за спречување и казнување на прекршувањата.“

Понатаму тој нагласи дека земјите треба да соработуваат со Меѓународниот кривичен суд (МКС) во врска со злосторствата извршени од Израел и ја истакна важноста од користење на универзалната јурисдикција во националните судови за гонење на злосторствата според меѓународното право.