ИСТАНБУЛ (АА) - Норвешката агенција за заштита на податоци (DPA) тврди дека ТикТок продолжува да ги пренесува личните податоци на корисниците до Кина, откако корисниците добиле известување за тоа како се обработуваат нивните податоци, јавува Анадолу.

„Оваа недела, норвешките корисници на ТикТок добија известување за тоа како компанијата ги обработува нивните лични податоци. Компанијата ги информира дека ќе продолжат со практиката на трансферирање на личните податоци во Кина“, тврди норвешката агенција во писмена изјава.

Ова значи дека личните податоци на норвешките и европските корисници ќе останат достапни за вработените на ТикТок во Кина, според соопштението.

„Практиката би можела да има негативни последици за приватноста бидејќи кинеското законодавство потенцијално би можело да бара податоците да се споделуваат со кинеските власти. Во исто време, тешко е да се предвиди дали овие податоци всушност ќе им бидат предадени на кинеските власти во иднина“, рече раководителот на оддел во Норвешката агенција за заштита на податоци, Тобијас Џудин.

ТикТок сè уште не ги коментираше тврдењата.

Во мај, ирските власти за заштита на податоци му изрекоа казна од 530 милиони евра на ТикТок за кршење на европските правила за приватност, што е една од најголемите казни досега изречени според Општата регулатива за заштита на податоци.

Пресудата следеше по долга истрага од страна на Комисијата за заштита на податоци на Ирска, која откри дека ТикТок ја прекршил регулативата со пренесување на личните податоци на европските корисници во Кина, каде што до нив пристапиле инженери.

ТикТок изјави дека ќе се жали на одлуката и предупреди дека пресудата може да има сеопфатни последици за другите глобални компании што ракуваат со прекугранични текови на податоци.