Новата надворешна политика на САД „во голема мера“ се совпаѓа со визијата на Русија, објави Кремљ

ИСТАНБУЛ (АА) – Кремљ денес објави дека новата надворешнополитичка конфигурација на сегашната американска администрација под Доналд Трамп „во голема мера“ се совпаѓа со визијата на Русија, пренесува Анадолу.

„Новата (американска) администрација брзо ги менува сите конфигурации на надворешната политика. Тоа во голема мера се совпаѓа со нашето гледиште“, рече портпаролот на Кремљ, Дмитриј Песков, во интервју за државната телевизија Русија-1, кое беше снимено во средата, а чиј исечок беше споделен од новинарот Павел Зарубин на платформата Телеграм.

Потсетувајќи дека Русија и САД гласаа на ист начин за резолуцијата на Генералното собрание на ОН за Украина кон крајот на минатиот месец, Песков тоа го нарече „навистина незамисливо“.

На 24 февруари, Генералното собрание на ОН усвои нацрт-резолуција со која се повикува на сеопфатен, праведен и траен мир во Украина, при што и Русија и САД гласаа против.

Зборувајќи за напорите за обновување на односите меѓу Русија и САД, Песков рече дека во моментов се прават обиди за подобрување на сите аспекти на билатералните односи, но дека „пред нас е долг пат“ поради значителната штета нанесена на овие врски во текот на претходната американска администрација.

„Но, ако се задржи политичката волја на двајцата лидери – претседателот Путин и претседателот Трамп – тогаш тој пат може да се помине доста брзо и успешно“, додаде Песков.

Тој истакна и дека сега треба да се дефинираат низа можни теми за соработка меѓу Москва и Вашингтон, но дека не треба да се очекуваат брзи резултати.

Песков додаде дека францускиот претседател Емануел Макрон сè уште не презел никакви чекори за комуникација со Путин, осврнувајќи се на саботната изјава на претседателот на Франција за медиумите, во која тој не ја исклучи можноста за таков дијалог.