Нетанјаху негираше напредок во преговорите за прекин на огнот во Газа

АЛ КУДС/ЕРУСАЛИМ (АА) - Израелскиот премиер Бенјамин Нетанјаху синоќа одговори на изјавите на Џон Кирби од американскиот Совет за национална безбедност за договорот за прекин на огнот во Појасот Газа, јавува Анадолу.

Нетанјаху тврди дека неговата Влада не добила одговор од палестинската група на отпорот Хамас на предлогот за прекин на огнот и размена на заробеници, иако поднеле „јасен предлог“ и пратиле преговарачки тим во Каиро минатата сабота.

Кирби им рече на новинарите дека „постои добар предлог пред двете страни и двете страни мора да го прифатат тој предлог за да го спроведат“.

Тој додаде дека Соединетите Американски Држави веруваат дека двете страни „мора да го завршат последниот дел од работата“ за да дојде до склучување договор.

Израелскиот преговарачки тим го напушти Каиро минатата сабота набрзо по пристигнувањето. Според израелскиот весник „Једиот Ахронот“, делегацијата се вратила во Тел Авив поради несогласувања со Нетанјаху, иако причината за несогласувањата не е прецизирана.

Ниту египетските, ниту катарските посредници, ниту Хамас не го коментираа продолжувањето на преговорите, особено по убиството на политичкиот лидер на Хамас, Исмаил Ханије, во иранскиот главен град Техеран минатата среда.

Американскиот претседател Џо Бајден на 31 мај изјави дека Израел претставил договор во три фази со кој ќе се стави крај на непријателствата во Газа и осигурување ослободување на заложниците во крајбрежната енклава. Планот вклучува прекин на огнот, размена на заложници и заробеници и обнова на Газа.

Повеќе од 39.600 Палестинци се убиени откако Израел започна брутален напад врз Газа на 7 октомври по нападот на Хамас.