Ahmet Gençtürk
26 Ноември 2021•Ажурирај: 29 Ноември 2021
АНКАРА (АА) - Дваесет и седум истакнати невладини организации во Грција предупредуваат дека бегалците и барателите на азил се соочуваат со глад по одлуката на Владата во октомври да ги прекине услугите за оние чии барања за азил се прифатени, јавува Агенција Анадолија (АА).
„Околу 34.000 баратели на азил поминале речиси два месеци без парична помош, која претходно ја добивале за да купат храна, облека и основни работи“, се вели во соопштението на Меѓународниот комитет за спасување.
Истакнатата глобална невладина организација за хуманитарна помош, помош и развој, истакна дека проблемите започнале кога Владата на 1 октомври ја презеде програмата за парична помош финансирана од ЕУ, која претходно ја управуваше Агенцијата за бегалци на ОН.
Владата даде јавно уверување дека распределбата ќе продолжи до крајот на октомври, но еден месец подоцна, проблемот што има разурнувачки ефект врз барателите на азил останува нерешен, според Комитетот.
Запирањето на паричната помош им го одзема достоинството на барателите на азил и ги лишува од спасот од кој многумина зависат. „Бегалците и барателите на азил, кои веќе беа економски маргинализирани, прибегнуваат кон питачење и други негативни механизми за да преживеат“, велат од Комитетот.
Емили Вилсон, хуманитарен работник во проектот „Елеа“, го привлече вниманието за ужасната ситуација на жените и децата бегалци.
„Жените во кампот „Елеонас“ постојано ни кажуваат дека нивните деца плачат ноќе од глад. Мајките сега немаат пари за млеко за бебиња, па наместо тоа, мешаат бисквити во вода“, рече таа.
Марта Русу од Меѓународниот комитет за спасување рече дека одлуката на Владата ги турнала веќе ранливите и маргинализирани бегалци на работ.
Обвинувајќи ја грчката Влада дека создава криза со глад меѓу бегалците и барателите на азил, Анита Беј, директорка на „Да ги спасиме децата - Европа“ (Save the Children Europe), рече: „Незаконско, непотребно и целосно неприфатливо е ова да се случува во ЕУ“.
Според тоа, невладините организации, вклучително грчките, европските и светските организации, ја повикаа грчката Влада да го реши проблемот со рестартирање на распределбата на средствата, дистрибуција на соодветна храна за оние кои живеат во бегалските кампови и обезбедување итна помош во форма на основните потреби и ваучери.
