Најголемиот шумски пожар во Калифорнија им се заканува на историските дрвја Џошуа во пустината Мохаве

ХЈУСТОН (АА) - Пожарникарите продолжија да се борат со најголемиот шумски пожар во американската сојузна држава Калифорнија, кој ги зафаќа дрвјата Џошуа во пустината Мохаве, пренесува Анадолу.

Пожарот во Јорк, кој избувна минатиот петок, изгоре повеќе од 82.000 хектари земјиште и во Калифорнија и во Невада, уништувајќи ги дрвјата Џошуа во националниот резерват Мохаве.

„Ќе биде потребен цел живот за да се вратат тие стари дрвја Џошуа. Ова е прилично разорувачки“, рече Лаура Канингам од еколошката група на Вестерн Вотершедс Проџект во интервју за телевизискиот канал „КВВУ“.

Дрвјата Џошуа не растат на ниедно друго место во светот освен во пустината Мохаве. Уникатните шилести растенија може да живеат повеќе од 150 години, но огромниот шумски пожар го загрозува нивниот опстанок.

„Кога ќе се изврши броењето, ќе има вкупно десетици илјади, а можеби и стотици илјади дрвја Џошуа“, рече Брендан Камингс од Центарот за биолошка разновидност во интервју за „Сан Франциско хроникал“.

Официјални претставници за заштита на животната средина рекоа дека шумскиот пожар им се заканува и на повеќе од 200 ретки растенија што потекнуваат од националниот резерват, но дрвјата Џошуа се во фокусот на вниманието.

„Ако изгори област со дрвја Џошуа, повеќето нема да преживеат и репродукцијата во таа област ќе биде отежната“, се вели во соопштението на Службата за национални паркови.

„Пожарите, исто така, може да резултираат со губење на незаменливи ресурси во паркот, како историски градби и културни артефакти“, се додава во соопштението.

Речиси 400 пожарникари и персонал за итни случаи се борат со шумскиот пожар на големата пустинска топлина со температури над 37,7 Целзиусови степени. Од вторникот пожарот беше локализиран само 23 отсто.

Причината за пожарот во Јорк сѐ уште се истражува.