Началникот на израелскиот Генералштаб го критикуваше Нетанјаху поради недостиг на стратегија по војната

ИСТАНБУЛ (АА) - Началникот на Генералштабот на израелската војска Херзи Халеви го критикуваше премиерот Бенјамин Нетанјаху дека нема владина стратегија за тоа кој ќе управува со Појасот Газа откако Тел Авив ќе го прекине нападот, и дека ја навел војската да изврши повторен напад на одредени области, пренесува Анадолу.

Халеви, како што се наведува, го критикувал недостатокот на „стратегија за ден потоа“, за време на безбедносниот состанок викендов.

Израелскиот Канал 13 објави дека Халеви изразил незадоволство поради неможноста да развие и да прогласи стратегија за управување со Газа.

Халеви рече дека војската извршила нови напади во Џабалија во северниот дел на Газа, нагласувајќи дека доколку не се направи чекор за формирање друга влада освен на Хамас во регионот, Израел ќе биде принуден да ги повтори нападите на друго место.

Опишувајќи ја ситуацијата дека е „без крај“, Халеви упати критики до Нетанјаху поради недостатокот на јасна стратегија.

Според Канал 12, Нетанјаху, наводно, имал несогласување со директорот на израелската агенција за безбедност Шин Бет, Ронен Бар, изразувајќи незадоволство за состанокот за планирање стратегија што Бар го имал со министерот за одбрана Јоав Галант.

На 7 мај, израелската војска започна копнен напад врз подрачјето на Рафа, преземајќи ја контролата на палестинската страна на граничниот премин Рафа што ја поврзува Газа со Египет.