Началникот на Генералштабот на САД разговараше со началниците на генералштабовите на 13 земји за руско-украинската војна

ВАШИНГТОН (АА) - Началникот на Генералштабот на САД, генерал Марк Мили, преку видеоконференција разговараше за руско-украинската војна со началниците на генералштабовите на 13 земји, вклучувајќи го и началникот на Генералштабот на Турција, генерал Јашар Ѓулер, пренесува Агенција Анадолија (АА).

Полковникот Дејв Батлер, портпарол на началникот на здружениот Генералштаб, во писменото соопштение истакна дека генералот Мили преку видеконференција одржал заеднички состанок со началниците на генералштабовите на Австралија, Канада, Данска, Франција, Германија, Грција, Италија, Холандија, Норвешка, Португалија, Шведска, Турција и Велика Британија.

„Воените лидери ги споделија своите оценки за континуираната руска окупација на Украина, вклучително и мултилатерална безбедносна помош за да ѝ се помогне на Украина да го врати и одбрани својот суверенитет“, рече портпаролот Батлер.

Истакнувајќи дека Мили ги повикал своите колеги да продолжат да ја забрзуваат дополнителната воена помош за Украина, полковникот Батлер додаде: „Началникот на Генералштабот ја потврди важноста на ангажманите со сојузниците и партнерите за задоволување на итните потреби на Украина.“