НАТО ја потврди подготвеноста да ги брани сите сојузници од каква било закана

БРИСЕЛ (АА) – НАТО соопшти дека пресретнале уште една балистичка ракета која се движела кон Турција, повторувајќи ја подготвеноста на Алијансата да ги брани сите свои членки од каква било закана, изјави денес портпаролката Алисон Харт, пренесува Анадолу.

„НАТО повторно пресретна ракета која се движеше кон Турција. Алијансата останува цврсто подготвена да ги брани сите сојузници од секоја закана“, напиша портпаролката Харт на американската компанија за социјални медиуми Х.

Претходно во текот на денот, Министерството за одбрана на Турција соопшти дека балистичка ракета истрелана од Иран влегла во турскиот воздушен простор, по што била пресретната од системите на НАТО.

Делови од ракетата паднале на празно земјиште во југоисточната област Газиантеп, но нема жртви ниту повредени, додаваат од Министерството.

Во посебна изјава споделена на X, директорот за комуникации на Турција, Бурханетин Дуран, потврди дека ракетата била „навремено детектирана и неутрализирана од системите за противвоздушна одбрана на НАТО над населбата Шахинбеј во Газиантеп“.

„Уште еднаш силно го повторуваме нашето предупредување до сите страни, особено до Иран, да се воздржат од дејствија што би можеле да ја загрозат регионалната безбедност и да ги доведат цивилите во опасност“, рече тој.

Минатата среда, Министерството за одбрана соопшти дека балистичка муниција истрелана од Иран кон турскиот воздушен простор била пресретната и неутрализирана од единиците за противвоздушна одбрана на НАТО во Источниот Медитеран.

Регионалните тензии ескалираа по 28 февруари кога САД и Израел започнаа заеднички напади врз Иран во кои се убиени повеќе од 1.200 луѓе, меѓу кои и врховниот лидер, ајатолахот Али Хаменеи.

Иран возврати со ракетни напади и напади со беспилотни летала насочени кон Израел и арапските земји каде што се наоѓаат американски воени бази.