НАТО: Одбраната на Европа во голема мера се осигурува од страна на земјите надвор од ЕУ, како Турција

БРИСЕЛ

Генералниот секретар на НАТО, Јенс Столтенберг, истакна дека одбраната на Европа се осигурува од страна на САД, Канада и Велика Британија на север, додека на југ се осигурува од страна на земјите кои не се членки на Европската Унија (ЕУ), како Турција, пренесува Агенција Анадолија (АА).

Столтенберг во изјавата за новинската агенција АФП, нагласи дека одбраната на Европа е повеќе заснована на трансатлантските врски, а не на потрагата по стратешка автономија која, според него, ЕУ веќе извесно време сака да ја донесе.

Според него, мнозинството од земјите членки на ЕУ се сојузници на НАТО, а како што рече тој, 90 отсто од населението на ЕУ живее во земјите членки на НАТО.

Тој истакна дека е задоволен од напорите на ЕУ за зголемување на трошоците во областа на одбраната, но дека е скептичен во врска со стратешкото партнерство кое особено го брани францускиот претседател Емануел Макрон.

Осврнувајќи се на трошоците на ЕУ во областа на одбраната, Столтенберг рече: „Ги поздравуваме овие напори сè додека тие го исполнуваат НАТО. Но, ЕУ не може да ја брани Европа.“

Столтенберг нагласи дека иако 90 отсто од населението на ЕУ живее во земјите членки на НАТО, само 20 отсто од трошоците на НАТО во областа на одбраната доаѓаат од овие земји.

Според Столтенберг, НАТО се соочува со голем број предизвици, како Русија, развојот на Кина, кибернападите и меѓународниот тероризам.

„Не верувам само во Европа или само во Северна Америка, туку јас верувам во стратешката солидарност на двете во НАТО. Бидејќи ниту една земја или ниту еден континент не може сам да управува со безбедносните предизвици со кои се соочуваме денес“, додаде Столтенберг.

Генералниот секретар на НАТО рече дека од географски аспект, на север САД, Канада и Велика Британија ја бранат Европа од Русија, и дека ниту една од овие земји не е земја членка на ЕУ.

Тој нагласи дека Турција, која се наоѓа на југоистокот, на границата со Сирија и Ирак, и која не е земја членка на ЕУ, игра многу важна улога во одбраната на НАТО.

Столтенберг подвлече дека Турција е исклучително важна земја особено во борбата против терористичката организација ДЕАШ.