Merve Gül Aydoğan Ağlarcı
27 Јуни 2022•Ажурирај: 28 Јуни 2022
АНКАРА (АА) - Генералниот секретар на НАТО, Јенс Столтенберг, денес изјави дека имаат за цел да постигнат напредок во кандидатурите за членство на Финска и Шведска пред самитот во Мадрид, јавува Агенција Анадолија (АА).
„Имаме за цел да постигнеме напредок во историските апликации на Финска и Шведска за членство во НАТО, истовремено осигурувајќи да се решат безбедносните грижи на сите сојузници. Разговарав со (турскиот) претседател (Реџеп Таип) Ердоган во саботата и ќе се сретнам со шведската премиерка (Магдалена) Андерсон подоцна денеска“, рече Столтенберг на прес-конференцијата во Брисел пред самитот.
Столтенберг истакна дека НАТО треба „да ја земе предвид загриженоста изразена од сојузниците, во овој случај од Туркије. „И тоа е и причината зошто го интензивиравме дијалогот со нашиот сојузник и со Финска, Шведска, во последните недели.“
„Финскиот и шведскиот лидер во вторник во Мадрид ќе се сретнат со турскиот претседател Реџеп Таип Ердоган“, изјави генералниот секретар на НАТО. На средбата, на која ќе учествува и Столтенберг, ќе ѝ претходи „уште една средба на високи претставници од сите три земји“ во седиштето на НАТО.
„Нашиот НАТО самит во Мадрид ќе биде трансформативен со многу важни одлуки, вклучително и за новиот стратешки концепт за новата безбедносна реалност“, рече тој.
Столтенберг нагласи дека НАТО „ќе ги трансформира силите за одговор на НАТО и ќе го зголеми бројот на нашите сили за висока готовност на над 300.000“.
Лидерите на НАТО треба да се состанат во Мадрид за да разговараат за тоа што би можело да биде најголемото воено распоредување од крајот на Студената војна.
Самитот ќе трае од вторник (утре) до четврток, а разговорите се очекува да бидат фокусирани на одговорот на НАТО на војната во Украина и барањата на Финска и Шведска за приклучување на 30-члената воена алијанса.
Шведска, заедно со Финска, официјално поднесе барање за влез во НАТО минатиот месец, одлука поттикната од руската војна против Украина, што започна на 24 февруари.
Но, Туркије, долгогодишна членка на Алијансата, изрази приговори за кандидатурите за членство, критикувајќи ги земјите дека толерираат, па дури и поддржуваат терористички организации.
Во својата над 35-годишна терористичка кампања против Туркије, ПКК, којашто е на листата на терористички организации од Турција, САД и ЕУ, е одговорна за смртта на над 40.000 луѓе.
