Ekipa
23 Ноември 2021•Ажурирај: 24 Ноември 2021
БРИСЕЛ (АА) - Министрите на Европската Унија (ЕУ) се состанаа денес во Брисел за да дискутираат за одговорот на Унијата во однос на зголемениот број случаи на Ковид-19, односите меѓу ЕУ и Велика Британија и кризата на ЕУ-белоруската граница, јавува Агенција Анадолија (АА).
Според официјалната агенда, министрите задолжени за прашањата на ЕУ ќе се подготват за самитот на лидерите на ЕУ во декември и ќе разговараат за најновите случувања што влијаат на политиката на ЕУ.
„Во таа рамка, ќе дискутираме за координацијата во врска со Ковид-19“, изјави за новинарите Гаспер Довзан, словенечкиот министер за надворешни работи.
„Има значителни предизвици на овој фронт“, рече тој, додавајќи: „Многумина го потценија предизвикот на колебливоста при вакцинацијата.“
„Мораме да продолжиме со напорите да ја надминеме колебливоста за вакцинација, да се бориме со лажните вести за несаканите ефекти и последиците, и секако, да ги охрабриме граѓаните да се вакцинираат за да се заштитат здравствените системи и да се одржи внатрешниот пазар“, додаде Довзан.
Не се очекува министрите да преземат одлуки во врска со кризата со Ковид-19, но нивното водство е особено важно бидејќи Европската комисија треба да ги ажурира своите препораки подоцна во текот на оваа недела во врска со патувањата во Блокот, вклучително и новите правила за дигиталната ковид-пропусница и бустер-дозите на вакцините.
Потпретседателот на Европската комисија, Марош Шефчовиќ, кој е задолжен за преговорите по Брегзит, ќе се приклучи на министрите на разговори за односите на Блокот со Велика Британија, во услови на спорот за трговијата со Северна Ирска, како и проблемот со рибарството меѓу Франција и Велика Британија.
„Посветени сме да продолжиме да работиме на функционални односи со Велика Британија“, изјави Довзан, додавајќи дека ЕУ може да покаже флексибилност, но дека треба да се држи до веќе постигнатите договори.
Министрите исто така ќе дискутираат за миграциската криза на границите на ЕУ со Белорусија.
Литванскиот министер за надворешни работи, Арнолдас Пранцкевичиус, пред состанокот изјави дека неговата влада ги очекува предлозите на Европската комисија, што треба да бидат објавени подоцна во текот на денот, за кои се надева дека ќе вклучуваат исто така промени во Шенгенскиот граничен код, како и други мерки кои се потребни за земјите членки да ги ублажат и да ги решат таквите хибридни напади во иднина.
Тој исто така повика на нови санкции против белорускиот режим и ја нагласи важноста за обезбедување пристап на хуманитарните организации да можат да донесат хуманитарна помош за мигрантите во Белорусија и да помогнат во нивното враќање.
Пранцкевичиус спомена дека министрите ќе разговараат за неодамнешните тензии во Босна и Херцеговина кои предизвикуваат „голема загриженост“.
„Ние се залагаме за единствена и независна Босна и Херцеговина и нејзината иднина во Европската Унија“, рече тој.
Меѓу другите теми на дневниот ред, министрите ќе се подготват и за самитот ЕУ - Африка во февруари, а ќе разговараат и за високите цени на енергијата, како и за извештајот за владеењето на правото за Италија, Хрватска, Јужен Кипар, Литванија и Летонија.
