Министер Бен-Гвир им дозволи на еврејските доселеници да се молат во комплексот на џамијата Ал-Акса

ЕРУСАЛИМ (АА) - Крајно десничарскиот израелски министер за национална безбедност Итамар Бен-Гвир денес им даде дозвола на нелегалните еврејски доселеници да се молат во комплексот на џамијата Ал-Акса во окупираниот Источен Ерусалим.

Говорејќи во Кнесетот (израелскиот Парламент), Бен-Гвир тврдеше дека тој го претставува политичкото раководство и дека им дозволува на Евреите да извршуваат молитви во комплексот на џамијата Ал-Акса.

„Јас сум политички ешалон, а политичкиот ешалон дозволува молитва во Планина на храмот (џамијата Ал-Акса)“, рече Бен-Гвир.

Екстремистичкиот министер, познат по антипалестинската реторика, тврдеше дека се молел на тоа место минатата недела.

Според израелскиот јавен сервис КАН, изјавата на Бен-Гвир претставува срам за премиерот Бенјамин Нетанјаху, кој моментно е во посета на Вашингтон.

Минатиот месец Нетанјаху тврдеше дека статус кво состојбата во џамијата Ал-Акса „не се сменила и нема да се смени“ откако Бен-Гвир ги повика Евреите „јавно“ да се молат во комплексот.

Сегашната статус квото состојба им овозможува на муслиманите да се молат во комплексот Ал-Акса, а следбениците на другите религии да го посетат местото.

Ал-Акса за муслиманите претставува трето најсвето место на исламот. Евреите ја нарекуваат Планина на храмот, велејќи дека тоа било место на два еврејски храма во античко време.

Израел го окупираше Источен Ерусалим, каде што се наоѓа Ал-Акса, за време на Арапско-израелската војна во 1967 година. Го анектираше целиот град во 1980 година во потег што никогаш не беше признат од меѓународната заедница.