МАДРИД (АА) - Шефовите на држави и влади на земјите членки на НАТО денеска ги започнаа седниците во рамки на Самитот во Мадрид, јавува Агенција Анадолија (АА).

Говорејќи на отворањето на првата сесија за Украина, генералниот секретар на НАТО, Јенс Столтенберг, рече дека ќе бидат донесени важни одлуки за зајакнување на Алијансата во свет каде што „авторитарните режими“ како Русија и Кина го оспоруваат поредокот заснован на правила.

Во врска со планот за НАТО, новиот документ за стратешки концепт, кој ќе биде одобрен во Мадрид, Столтенберг рече дека сојузниците ќе ги зајакнат одвраќањето и одбраната на Алијансата додека ги отвораат вратите за Шведска и Финска со формална покана.

Според шефот на НАТО, украинскиот претседател Владимир Зеленски ќе одржи говор пред лидерите, а ќе биде усвоен и сеопфатен пакет за поддршка на Украина разурната од војна.

Шпанскиот премиер Педро Санчез рече дека одлуките што ќе ги донесат сојузниците ќе го одредат капацитетот и употребата на ресурсите на НАТО во следните десет години.

„Светот нѐ набљудува“, рече тој.

Честитајќи им на Туркије, Финска и Шведска за потпишувањето на трилатералниот Меморандум за решавање на безбедносните грижи на Анкара, Санчез рече: „Влезот на овие две земји во НАТО ќе биде важна пресвртница.“