Лидерите на земјите од Г7 ќе се состанат на 13 јуни во Италија, ќе присуствува и Бајден

ВАШИНГТОН (АА) - Американскиот претседател Џо Бајден ќе присуствува на самитот на лидерите на Г7 во Италија следната недела, објави вчера Белата куќа, пренесува Анадолу.

За време на настанот од 13 до 14 јуни во Апулија, Бајден и лидерите на Г7 „ќе разговараат за низа најитни глобални прашања, вклучително и за непоколебливата поддршка на Г7 за Украина“, рече портпаролката на Белата куќа, Карин Жан-Пјер.

„Лидерите ќе ги унапредат напорите за користење на замрзнатите суверени фондови на Русија за помош на Украина, како и активностите за продолжување на наметнувањето трошоци на Русија и на оние кои ги поддржуваат руските воени напори. Лидерите на Г7 ќе преземат чекори за промовирање на економската безбедност и отпорност“, се вели во соопштението.

Се додава дека Бајден и лидерите на Г7 „исто така ќе ги удвојат своите обрски да ги поддржат земјите во развој кои сакаат да инвестираат во нивната иднина и да помогнат во зајакнувањето на безбедноста на храната и финансирањето на здравјето“.

Групата Г7 е назив за консултативниот форум на седумте најважни индустријализирани земји во светот. Се состои од претседателите на владите на Соединетите Американски Држави, Канада, Јапонија, Германија, Италија, Франција и Велика Британија. На состаноците учествуваат и претставници на Европската Унија и Европската комисија.