Лавров: „Иницијативата на Туркије за Појасот Газа е обид да се постигне деескалација“

МОСКВА (АА) - Рускиот министер за надворешни работи, Сергеј Лавров, денес изјави дека иницијативата на Туркије за Појасот Газа е обид да се постигне деескалација и да се нормализира ситуацијата, јавува Анадолу.

Говорејќи на прес-конференција во Пјонгјанг, главниот град на Северна Кореја, Лавров рече дека Русија е отворена за какви било конструктивни предлози и би сакала да дознае повеќе за иницијативата од Анкара.

„За што точно се мисли, би сакале да слушнеме од нашите турски пријатели, со кои сме во контакт, вклучително и за ова прашање.“

„Ние се залагаме дека секој пристап треба да се заснова врз баланс на интересите на страните, а не на наметнување нечии интереси на сметка на повреда на други. Ми се чини дека турската иницијатива е диктирана од желбата да се обезбеди таков баланс. Ние ќе бидеме подготвени да соработуваме при нејзиното разгледување“, рече тој.

Туркије продолжи со интензивните напори за смирување на ситуацијата во Газа, која беше влошена по ненадејниот напад на Хамас врз Израел на 7 октомври и израелскиот одговор преку немилосрдно бомбардирање и блокада на опколената палестинска енклава.

Анкара предложи систем на гарант за израелско-палестинскиот конфликт за да се стави крај на насилството и да се постигне решение со две држави.

Исто така, повика на итен хуманитарен прекин на огнот во Газа и прогласи тридневна национална жалост до сабота поради загубите на цивили.

Лавров рече дека постои „висок“ ризик актуелната криза да ескалира во конфликт низ регионот.

Тој ги критикуваше Соединетите Американски Држави (САД) дека ставиле вето на резолуцијата со која се бара прекин на огнот, што сега може да доведе до растење на конфликтот.

„Сведоци сме на обиди повторно Иран да се 'обвини' за сè. Обидите ги сметаме за прилично провокативни. Иранското раководство зазема одговорен, балансиран став и повикува да се спречи овој конфликт да се прошири во целиот регион, во соседните земји“, рече тој.

Запрашан за механизмите што би можеле да го запрат крвопролевањето, Лавров рече дека одлуката на Советот за безбедност на ОН со повик до сите страни да ги прекинат непријателствата и да обезбедат можност за решавање на хуманитарните прашања може да послужи за оваа цел.

„Какви се изгледите? Претпоставувам дека консултациите со заинтересираните земји ќе продолжат. Египет ја презема иницијативата. Сите ние би сакале да видиме деескалација во Појасот Газа“, рече тој.

Министерот рече дека ќе има контакти во наредните денови што ќе му овозможат да разбере колку е реално да се очекува прекин на огнот.

- Односи Русија-Северна Кореја

Рускиот министер рече дека разговарал со севернокорејските власти за обновување на политичките контакти на различни нивоа, за зајакнување на трговската и економската соработка.

Москва го поддржува Пјонгјанг во неговата загриженост за зголемената воена активност на САД, Јапонија и Јужна Кореја, како и линијата на Вашингтон за пренос на елементи од својата стратегиска инфраструктура, вклучително и нуклеарна, во регионот.

Лавров го избегна директниот одговор за датумите на посета на рускиот претседател на Северна Кореја, велејќи дека рускиот и севернокорејскиот лидер се сретнале пред еден месец.

„Сигурен сум дека контактите ќе продолжат“, рече тој.

Одговарајќи на загриженоста на Јужна Кореја за можна ескалација, Лавров рече: „Сеул е еден од факторите што овде ја ескалира ситуацијата.“

„Веќе го споменав формирањето на сојузот САД-Јужна Кореја-Јапонија за градење на воен потенцијал овде, вклучително и неговите нуклеарни компоненти. Ова создава тензии“, нагласи тој.

Лавров истакна дека Северна Кореја неколкупати иницирала мировни преговори, но сите обиди биле прекинати од спротивната страна што продолжува да поставува неприфатливи услови, барајќи еднострани отстапки од Пјонгјанг.

„Русија и КНДР (Демократска Народна Република Кореја), како и НР Кина (Народна Република Кина) се за дијалог и продолжување на преговорите без никакви предуслови. Мислам дека оваа линија ќе најде широка поддршка во регионот на Југоисточна Азија како целина“, рече тој.

Рускиот министер за надворешни работи рече дека ќе ја препорача Северна Кореја како туристичка дестинација.