Лавров изрази подготвеност на Москва за преговори, Туркије подготвена да биде домаќин

МОСКВА (АА) - Рускиот министер за надворешни работи Сергеј Лавров денес изјави дека кон крајот на оваа недела ќе се одржи нова средба меѓу Русија и Соединетите Американски Држави (САД), изразувајќи ја подготвеноста на Москва за разговори, известува Анадолу.

Говорејќи на прес-конференција со турскиот колега Хакан Фидан во Анкара, Лавров рече дека оваа недела се планирани опсежни разговори меѓу Русија и САД за да се надминат пречките за работата на дипломатските претставништва.

Лавров рече дека го информирал Фидан за резултатите од минатонеделните разговори со САД во Саудиска Арабија.

„Детално ги информиравме нашите турски пријатели за руско-американските преговори што се одржаа на 18 февруари во Ријад, кои се високо ценети во однос на можноста за конечно нормален дијалог и покрај многубројните противречности што, се разбира, сè уште постојат“, изјави Лавров.

Запрашан за изгледите за решавање на украинскиот конфликт, шефот на руската дипломатија рече дека Москва е подготвена за разговори со Украина, Европа и страните што сакаат да разговараат, но дека борбите ќе престанат само кога ќе се постигне решение прифатливо за Москва.

Тој потсети дека Русија неколкупати најавуваше прекин на огнот, но дека Украина ги искористи за да ги зајакне своите позиции.

„Подготвени сме да преговараме со Украина, Европа и со сите претставници што би сакале да помогнат да се постигне мир со добра волја, но ќе престанеме да се бориме само кога овие преговори ќе дадат цврст и одржлив резултат што ѝ одговара на Руската Федерација“, рече Лавров.

Тој, исто така, рече дека договор со Украина бил постигнат во Истанбул во април 2022 година, но поранешниот британски премиер Борис Џонсон го блокирал, а Западот го попречувал неговото спроведување за да ја ослаби Русија.

Според зборовите на Лавров, Москва очекува именување на претставник на САД за преговори со Русија за решавање на украинскиот конфликт.

Тој, исто така, посочи дека „непристапувањето на Украина во НАТО треба да биде услов во секој иден мировен договор“.

- Туркије е подготвена да биде домаќин на преговорите

Турскиот министер за надворешни работи Хакан Фидан изјави дека Туркије е подготвена да придонесе за мирот меѓу Русија и Украина.

Тој рече дека безбедносните гаранции се прашање што Анкара го следи со внимание.

Фидан, исто така, подвлече дека Анкара ѝ придава големо значење на новата американска иницијатива за ставање крај на руско-украинската војна „како пристап фокусиран на резултати“.

„Оваа ситуација е во согласност со политиката што ја водиме од почетокот на војната. Ѝ придаваме големо значење на новата американска иницијатива како пристап ориентиран кон резултати. Сметаме дека решение може да се постигне преку преговори во кои ќе бидат вклучени двете страни“, рече турскиот министер за надворешни работи.

„Во тој контекст“, продолжи министерот Фидан, „Туркије е подготвена да ја даде сета поддршка за воспоставување мир преку преговори и да биде домаќин на такви разговори.“

Министерот Фидан додаде дека Анкара ќе продолжи со напорите за осигурување безбедност на пловидбата по Црното Море.

Шефот на турската дипломатија рече дека со Лавров разговарале и за случувањата во Сирија разурната од војна.

„Ние сме целосно убедени дека територијалниот интегритет и единството на Сирија мора да се зачуваат. Туркије и Русија делат сличен став во однос на запирањето на сепаратистичките движења во Сирија“, рече Фидан и додаде дека не може да има толеранција кон терористичките организации што се вкорениле во Сирија.